Schottegatweg Nort- Tim di reshèrshi tékniko i forensiko ta investigando un aksidente den tráfiko ku saldo di dos morto. E aksidente a tuma lugá alrededor di 11 or di mainta riba djasabra unda un vehíkulo Mercedez Benz pretu  numerá R-41-8 a alkansá dos hòmber kant’i kaminda trahando. E impakto a resultá fatal pa ámbos víktima.

Tabata algun ratu promé di 11 or di mainta ku habitantenan den Julianalaan i Irenelaan den Emmastad a tende un impakto fuerte direkshon Schottegatweg Nort. Despues di e impakto, habitantenan riba Irinelaan a bin deskubrí dos hòmber sin señal di bida bentá;a boka abou nèt na muraya di nan kura. Un ratu despues bosero di polis Imro Zwerwer ta konfirmá morto di ámbos hòmber.

Mesora a drenta notfikashon di e aksidente unda Polis a manda diferente unidat di Rio Canario kompañá pa ambulans. Na yegada a bin nota e shofùr D.D.K  di 21 aña den un Mercedez Benz pretu miéntras den e kurá di kas riba Irenelaan a tabatin dos hòmber drumi boka abou kual unu di tabata falta un pida pia. E pia a bin resultá despues banda di un piko blanku pará skùin riba Schottegatweg Nort.

E dos víktimanan tabatin vèst oraño bisti riba nan flanèl indikando ku nan tabata trahando kant’i kaminda. Na momento polis a yega unu dje hòmbernan ya tabata sin pia miéntras su karson tabata for di su kurpa. E otro víktima ainda tabatin un djins blou na su kurpa. Informenan inisial ta señalá ku na momento e impakto a tuma lugá ku e trùk blanku riba Schottegatweg Nort, e dos víktimanan a bin resultá den kurá di kas na Irenelaan. Tim Tékniko di Reshèrshi ainda ta investigando kon e impakto por a  resultá den dos hòmber bentá sin bida

Informashon preliminar

Informashon preliminar dje aksidente ta señalá ku algun minüt promé di 11 or di mainta, e hóben di inisial D.D.K, nasé na Kòrsou di mayornan ulandes oropeo, tabata kore direkshon Ost riba Schottegatweg Nort na altura di Mangusá Supermarket. Na e lusnan di tráfiko nèt na krusada Schottegatweg i Beatrixlaan e hóben a intentá na pasa e lusnan di tráfiko riba un velosidat hopi haltu. Investigadónan ta sospecha ku D.D.K. tabata hasiendo un intento pa logra alkansá e lusnan di tráfiko pasando promé nan kambia den oraño. Ta sospecha na e momentonan aki e velosidat ku DDK a pasa na e lusnan, riba 120 km pa ora i kisas mas haltu.

Pasando na un velosidat asina haltu den e bògt konserní, DDk no tabata por a kontrolá e Benz mas. Na e momento e Benz tabata drentando e bògt, dos hòmber ku vèst oraño bisti tabata limpiando kant’i kaminda riba Schottegatweg. Nan tabata limpiando patras di e baki di un trùk  blanku. D.D.K., pèrdiendo kontrolá riba un velosidat haltu a bin dal entre e dos hòmbernan i baki di pikòp. Polis a bin haña e baki mancha na sanger, lokual a kondusí ku e dos hòmbernan tabata trahando ku e pikòp su motor mustrando direkshon Goisco miéntras nan tabata na e baki.  

E impakto tabata di tal índole, ku e hòmbernan mesora bai resultá den kura di Irenelaan 7 miéntras un pida pia a keda bentá riba Schottegatweg Nort. E Benz pretu a keda pegá den muraya di kurá di kas miéntras e pikòp blanku a bai resultá mei mei riba Schottegatweg Nort.

Detenshon

Bosero di polis Imro Zwerwer a konfirmá na Vigilante ku ámbos hòmber a bin pèrdè nan bida dor e impakto i ku médiko a konstatá morto. Entretantu a inisiá un investigashon ofisial unda a konsekuensha di e investigashon a detené e hóben di 21 aña di edat D.D.K. riba sospecho di “morto okashoná pa negligensha/kulpa”.  E kaso ta sigui bou di investigashon.

Segun un informe di polis, e dos personanan kende a pèrdè nan bida ta Emmanuel C Martina nasé na Kòrsou riba 19 aprel 1954 i Chrisphonte Decopin nasé na Haiti 20 februari 1969.