ARUBA—-Djadumingu pa mas o ménos 5:00 am a start un persekushon tras di un outo marka Toyota modelo Vitz debí ku e lo ta koriendo iresponsabel y sin lus patras. Komo ku e outo no kier a para, a disidí ku den Madiki Kavel a los mas di 10 tiru riba e outo, ku a alkansá e hóben na stür y a mat’é al instante.

E dòkter forensiko di polis a presentá y konstatá morto di Ayden CJ Lanoy di apénas 19  aña di edat. Ta un hóben ku algun luna pasa a bira tata y komo tal a bai laga un baby resien nasi atras. El a atendé SPO Brazil, ta bibando na Savaneta y ta trahando na Save a Lot na Boegoeroei. El a hasta partisipá na un festival di kanto, no muchu tempu pasa, kantando un kansion kompositá pa Jeon. 

Ayden a pèrdè un ruman, dos aña pasa, tambe na un edat hopi hóben. Su amigunan ta sigurá ku e ta un mucha hòmber ketu, ta traha pa su salario y no ta problemátiko. Kiko por a pasa djadumingu mardugá ainda ta un misterio pasobra e mes no t’ei pa konta. Sinembargo, por lo ménos un amigu tabata su tras y lo a graba e persekushon kompleto, ku lo mester por sirbi komo material klave den solushoná e misterio y yuda Landsrecherche den ehekutá un investigashon neutral y hustu pa ámbos partido, tantu pa e polis komo pa e víktima. Fuente 24ora .com