Back to Top
Vigilante banner image

Por kambia kontenido di Pakete Nashonal ku akuerdo ‘OR’ ku ta remplasá COHO


April 5, 2023 • 2 minüt pa lesa

Gobièrnu di Reino Hulandes huntu promé ku a firma e Onderlinge  Regeling.

WILLEMSTAD – Gobièrnunan di Reino Hulandes a firma e asina yamá ‘Onderlinge Regeling’ (OR) ku ta remplasá COHO.

 Awó Sekretario di Estado Alexandra van Huffelen a start e proseso pa hala aden e proposishon dje Rijkswet Coho. Ela informá Parlamentonan Hulandes ku kiko e OR ta enserá. Entre otro artíkulo 3 dje areglo akí ta hasi posibel pa kambia kontenido dje Paketenan Nashonal ku e medidanan ku paisnan Aruba, Kòrsou i Sint Maarten mester ehekutá. E Paketenan Nashonal ku kua tur pais a bai di akuerdo na fin di 2020 lo sigui ta e base pa e koperashon.

Artíkulo 3 dje reglamento ta duna e posibilidat di kambia e kontenido dje paketenan akí, si Hulanda i e paisnan di Karibe ta di akuerdo ku e kontenido dje kambio, i despues ku Parlamento dje pais en kuestion tin konosementu di esaki. Pa sostené e implementashon dje Paketenan Nashonal, e organisashon Tijdelijke Werkorganisatie (TWO) ta keda eksistí denter di e ministerio di Van Huffelen. TWO lo ehekutá su tarea huntu ku e organisashonnan ehekutivo ku ta establesé den e paisnan i ku ta kai bou di e Promé Ministernan. Huntu nan ta responsabel pa sosten, guia i monitoriá e ehekushon dje reformanan (artíkulo 4).

“TWO ta disponé di mas di 30 mion euro anual te ku 2027. Aproksimadamente 6,5 mion euro dje suma akí ta pa gastunan atministrativo, tantu pa e personal di TWO mes komo pa ekspertonan di otro departamentonan. Por usa e fondonan restante pa finansiá proyektonan di reforma òf pa pone ekspertisio adishonal òf kapasidat di implementashon adishonal (artíkulo 9). E manera di traha ta korespondé ku e forma ku a traha riba e reformanan durante e último 2 añanan. Esaki ta nifiká ku Tweede Kamer, Eerste i e Parlamentonan dje paisnan, lo sigui risibí agèndanan i rapòrtnan di ehekushon porloménos dos be pa aña. E agèndanan di ehekushon ta inkluí e proyektonan, programanan i medidanan di reforma ku lo prepará òf implementá den e próksimo periodo, indikando e resultadonan ku mester alkansá i e plasonan mará na esaki (artíkulo 5).”

Konforme artíkulo 6 dje OR, despues por elaborá e proyektonan, programanan òf medidanan akí den plannan di akshon. I artíkulo 7 ta regla ku e rapòrtnan di ehekushon ta kontené un deskripshon general dje progreso pa ku e ehekushon dje aktividatnan planifiká. “Pa ekspresá e apropiashon dje paisnan, meskos ku tabata e kaso ku e agèndanan di ehekushon durante e último dos añanan, TWO huntu ku e organisashonnan ehekutivo lo traha e rapòrtnan di ehekushon. E método di trabou eksakto ta establesé den tres reglamentu di método di trabou bilaterial, ku ta inkluí komo anekso na e OR. Awó ku e agèndanan i e rapòrtnan di ehekushon lo ta adoptá konhuntamente, e plannan di akshon ta rekerí aprobashon di Hulanda. Esaki ta nifiká ku mester yega na un akuerdo tokante e kontenido.”

Tur hende na mesa pa bai di akuerdo ku e OR.
Momento ku Minister Presidènt Pisas tambe a pone su firma.
Onderlinge Regeling a bira un realidat.
Login