CMC ta disponé di un kantidat di 30 ròlstul.

Willemstad- Ayera durante oranan di mainta Vigilante a risibí notifikashon ku CMC no tin mas ròlstul disponibel pa transportá pashèntnan.

E situashon tabata di tal índole ku boluntario nan mester a transportá sigur un pashènt riba stulnan ku tin wil. E relashonista públiko di CMC kende ta Germaine Gibbs a duna di konosé ku CMC ta disponé di 30 ròlstul. Esaki ta pone ku na momentu ku un pashènt yega na un orario pik por sosodé ku tur e ròlstulnan ta den uzo òf esnan ku ta transportá pashèntnan no a trese nan bèk na nan lokalidat sentral.

Gibbs ta splika ku lo ideal ta ku CMC por kumpra mas ròlstul. E ta sigui bisa ku boluntarionan ta hasi nan máksimo esfuerso pa por buska ròlstul na momentu ku tin mester di esakinan. Tambe Gibbs ta duna di konosé ku CMC ta den proseso pa bestèl 39 ròlstul mas. A base di nan kalkulashonnan esaki lo kubri tur e nesesidat. E ta agregá ku na SEHOS tabata tin un total di 20 ròlstul.

Mas aleu Gibbs ta duna di konosé ku CMC ta den e fase final di e bestelling di ròlstul. Nan ta risibiendo e kotisashon di e provedor. Por spera e ròlstul nobo nan den e promé kuartal di 2023.