Back to Top
Responsive image
E korant di pueblo

Posibilidat di repatriashon pa venezolanonan riba 30 òktober 2021


October 9, 2021 • 2 minüt pa lesa

WILLEMSTAD – Ministerio di Hustisia konhuntamente ku Direktorado di Relashonnan Eksterior den koperashon ku Kònsùl di Venezuela, ta hasiendo esfuerso pa por ehekutá un buelo di repatriashon 30 di òktober benidero si tin sufisiente interes.

Na e momentunan akí tin vários Venezolano na Kòrsou ku debí na diferente faktor ta deseá di regresá nan pais. Aparte di esaki tin personanan prosedente di Venezuela ku awor akí ta detené en espera di regreso pa nan pais, despues di a trata di drenta Kòrsou di forma indokumentá òf ku despues di a drenta di forma legal no a hasi e petishonnan nesesario pa estadia legal i konsekuentemente a bini den kontakto ku Hustisia.

Aktualmente, ainda no tin buelo komersial entre Kòrsou i Venezuela ku por fasilitá e personanan akí regreso pa nan pais. En bista di esaki, Minister di Hustisia ta den kombersashon ku Kònsùl di Venezuela pa logra realisá un buelo humanitario pa dia 30 di òktober próksimo.

Por lo pronto pasashinan ta na benta te ku 21 di òktober prόksimo pa 6’or di atardi na Curacao Handling Agent na Pietermaai Parking Mall, na un preis di Naf 436,–. inkluso ‘airport tax’. Pa e buelo akí lo tin un kantidat di lugá disponibel.

Ta eksigí un prueba di tèst di PCR di 48 ora promé ku e buelo, ku ta demostrá ku e persona konserní a tèst negativo pa COVID-19. Na yegada na Venezuela tambe tin ku pasa un PCR- tèst. Esaki lo kosta U$ 60. E pago mester tuma lugá adelantá na momentu ku kumpra e pasashi.

Ta bon pa remarká ku Venezolanonan ku pa un òf otro motibu a drenta Kòrsou na forma ílegal, lo no bini na remarke pa e trayekto di ‘Integrashon Responsabel’. Si e personanan akí disidí di biaha boluntariamente i no a risibí un desishon di ekspulshon anteriormente, nan lo no risibí un desishon ministerial di ekspulshon (verwijderingsbeschikking). Konsekuentemente, no lo prohibí nan pa regresá Kòrsou denter di 3 aña i nan lo por hasi un petishon di pèrmit pa estadia legal despues di a bandoná Kòrsou.

Si tin residente di Kòrsou ku ainda ta pegá na Venezuela, nan tambe lo por hasi uso di e buelo akí i laga kumpra nan pasashi serka Curacao Handling Agent. Den kuadro di desaroyonan pa ku COVID-19 nan lo mester tene kuenta ku e reglanan vigente pa por drenta Kòrsou, ku ta deskribí riba www.gobiernu.cw.

Login