WASHINGTON—Premier Rutte i minister Hoekstra (Asuntunan Eksterior) a kuminsá nan bishita na presidente merikano Biden.

E mandatarionan hulandes a keda risibí na Kas Blanku pa e presidente i su minister di Eksterior Blinken. Pa Rutte esaki ta di tres presidente di Merka ku e tin un enkuentro ofisial na Washington for dia el a bira premier na 2010. El a bishita Obama (2011) i Trump (2019). Den último bishita el a interumpí Trump dilanti prensa tokante un diskushon komersial ku a hunga entre Merka i Union Oropeo. Ayera a papia riba diferente tema inkluso entrega di chipnan na China pa e fabrikante hulandes ASML. Merka no kier pa China dispone di teknologia avansá i ta di opinion ku e kompania na Veldhoven mester stòp ku e benta na China pero esaki lo no benefisia pasobra China ta un dje klientenan di mas grandi kaminda por gana miares. E areglo merikano Inflation Reduction Act tambe a keda diskuti, ta trata di benefisionan di belasting i supsidionan pa teknologia berde for di Merka. Na Oropa ta konsiderá esaki komo sosten di estado indesea. A papia tambe di e guera na Ukraina i Kumbre di Demokrasia, di kua Merka i Hulanda ta organisá huntu ku tres otro pais.