Nieuwe Haven– E disputa ta entre un famia mionario italiano Crociani i banko internashonal, BNP Paribas(Jersey Trust Corporation Limited) ta sigui den kortenan sivil di Kòrsou. Ya ta bai hasi 2 aña ku Vigilante ta publikando riba tratamentunan di e kaso. Na e momentonan aki, ta riba ròl pa tratamentu den korte, un suma di daño perwisio ku mester paga pa intentonan di skonde arte balorá na 55 mion florin den e kaso.

Ta trata di un prosedura sivil largu kontra di prensès Camilla De Bourboun Des Deux Siciles, su mama bionario Madame Edoarda Crociani, Croci International NV, manehá pa United International Trust, Apollo Trust, Centenial Management NV i United Trust Company. E problema mionario a bin resultá na Kòrsou, despues di años di bataya entre un mama i su yu muhé, kende a bring’é den kortenan internashonal di a saka aktivonan fo’i resultadonan finansiero di un fondo familiar. E bolsa di aktivo, tabata sirbi komo un protekshon pa e famia Crociani, kual ta konsistí di e mama, Edoarda, su dos yu muhénan, prensès Camilla i un otro yu muhé, eks prensès Cristiana.

Na finalnan di 2017, e yu muhé Cristiana, ta gana un kleim kontra di e mama Edoarda di riba 100 mion dòler estado unidense. Korte a ordená Edoarda pa manda tur aktivo bek ku e la saka fo’i e bolsa di invershon di e famia, prosedente di unu dje strukturanan di “trust”. E desishon di korte, a inisiá di su banda un ret di kasonan sivil rònt mundu inkluso na Kòrsou, unda e banko BNP Paribas a entamá un súplika kontra prinsipalmente Edoarda Crociani, kual ta e mama. BNP Paribas Jersey Trust Corporation huntu ku e mama tabata e “konfiadonan” den e struktura di “trust” kual korte a ordená pa 28 dia despues di e veredikto, paga e yu muhé Cristiana e suma di riba 100 mion dòler estado unidense.  Awor, BNP Paribas despues di e desishon di korte, ta buskando den korte sivil, desishon di wes pa haña por lo ménos 130 mion dòler bek. Den unu di e kasonan BNP Paribas ke pa suministrá nan mas informashon riba paradero i registrashon di 11 pintura balorá na riba 55 mion florin. BNP ta Camilla di ta skonde informashon i pa tal motibu BNP ta eksigiendo awor mas informashon. Ta trata di maniobranan for di 2015 pa 2016 unda a e.o. fabriká 7 akuerdo falsu pa laga e pinturanan mionario interkambiá di doño. Na mas di tres okashon e pinturanan balorá na kasi 30 mion dòler a kambia di doño durante luna di yüni 2016. Esaki pasobra e famia tabata sa ku BNP ta buskando na pone beslag riba nan. A traha konstrukshon di benta falsu . Despues di a bende e pinturanan unda nan mes a keda doño di nan, a kuminsá move e pinturanan mionario di Zurich pa Singapore. Esaki a kuminsá na novèmber 2016 apénas un dia promé ku e restringshon internashonal a drenta na vigor riba 26 di novèmber. I riba 1 desèmber a traha un konstrukshon kon prenses Camila ta traspasá e pinturanan pa un kompania off shore. Finalmente 1 di mart 2020 BNP a risibí e dokumentashonnan pa por inisiá e proseso di pone beslag via Suisa riba e pinturanan. Awor BNP paribas ta eksihí un suma di daño perwisio pa tur e aktonan di mala fe, segun nan ku e prensa a kometé pa trata na skonde e pinturanan.