WILLEMSTAD,- Presidente di parlamento, Charetti America-Fracisca tin proposishonnan konkreto pa evitá ku kada periodo di gobernashon ta krea retraso grandi den reunionnan pidi ku no ta logra subi agènda di parlamento. E proposishonnan ta pa stòp definitivamente ku e kustumber di reuní kada un siman pasa i tambe pa hasi reunionnan di komishon fiho di parlamento públiko.

Asina no solamente por plania mas reunion den un luna, pero tambe por tata sierto tópiko den reunion di komishon fiho sin ku mester yama reunion di Komishon Sentral òf reunion públiko pa atendé ku esaki. Asina America-Francisca ta deklará.

Mas aleu America-Francisca ta bisa ku e tin komprenshon pa reklamonan ku no ta logra yama tur reunion pidí. Den kaso di e reunion pidí riba RdK/CPR e presidente di parlamento ta duna un splikashon ku griffie di Staten kontinuamente ta hasi esfuerso pa haña e minister pa presentá den parlamento, pero sea minister no tabata na Kòrsou òf parlamento mes tabata di biahe pa Parlatino. Pa yama un reunion públiko semper ta wak ku tur miembro di parlamento ta presente.

E siman aki un kantidat grandi di parlamentario na ta asamblea general di Parlatino na Panama i pa fin di e luna aki tin reunion di Ipko na Hulanda. Konsekuentemente ta te den luna di yüni lo yama e reunion riba CPR, America-Francisca ta bisa.