WILLEMSTAD,– Despues ku Omayra Leeflang a skibi riba su facebook ku parlamentario Giselle Mc William a kont’é ku presidente di parlamento lo mester a hari i bisa ku ta bon idea na momentu ku parlamentario Carolina a trese dilanti e asuntu di bende droga konfiská ku Hulanda, presidente di parlamento Charetti America Francisca a bisa lo siguiente:

“Ta lamentabel ku hende ku mester sa mihó ta lanta falsu testimonio o akusashon kontra di otro djis pa purba kaba ku nan karakter.

Den siman ku a pasa mi a risibí algun screenshot kaminda mi a wòrdu akusá di a hari, bati man i bisa ku no ta un mal idea ora ku kolega Carolina a hasi su pregunta na minister den Staten tokante si por bende e droganan ku Hulanda.

Manera boso mes por a tuma nota den e screenshot nan agregá den e sekshon di komentario bou di e post aki, señora Omayra Leeflang a publiká e mentira aki riba su paginá, i ta bai asina leu di gaña asta riba mi kolega Giselle Mc William.

Tekstualmente e ta bisa ku, señora Giselle Mc William, kolega i lider polítiko di partido MAN, a deklará ku mi a hari bai patras den mi stul, bati man i bisa ku no ta un mal idea pa bende e droganan.

Señora Leeflang ta bai mas leu, i saka otro mentira bisando ku ami huntu ku mi kasa ta sostené negoshi di droga.

Mi a risibí asta insulto di parti di hendenan ku no konosémi i no a buska pa sa e bèrdat tampoko.

Esnan ku konosé mi bon, sa ku nunka lo mi hasi algu asina.

Ami na mi turno pa hustisia i bèrdat prevalesé, a aserka mi kolega Giselle Mc William pa puntr’é si ta bèrdat lokual ku señora Leeflang ta bisa. Señora Giselle MC William a kontestámi ku ta MENTIRA. “Nunka mi a bisa algu asina. Tur otro hende den sala tambe por konfirmá ku mi no a hari, ni bisa loke mi ta wòrdu akusá di dje. Al kontrario mi reakshon inmediato tabata di sorpresa i mesora konsulta ku e griffier banda di mi, tokante e pregunta hasi.

Normal mi no sa reakshoná mes riba akusashonnan i mentiranan den mi direkshon.

Pero mirando e kantidat di hende ku a aserka mi i puntrami ku si ta bèrdat esaki ta, mi a haña mi ta reakshoná. Mi konseho ta pa Pueblo habri wowo i orea, no kere tur hende ku ta papia riba otro hende. Tin hende nan tarea ta pa kaba ku bo karakter “character assassination”

the malicious and unjustified harming of a person’s good reputation.”

Rabia riba hende ta un kos ku ta kome pió ku kanser.

Ami no tin enemigu, pero señora Leeflang a tuma riba su mes pa strukturalmente purba daña mi nòmber.  Awe mi ta papia nada mas i nada ménos ku bendishon riba dje.

E presidente di parlamento ta pidi tur hende pa no bai ataká ni papia malu di señora Leeflang.

E ta bisa pa nunka paga malu ku malu na ningun hende. Respetá loke ta korekto den bista di tur hende i si ta posibel, asina leu ku ta dependé di boso, sea na pas ku tur hende. Nunka no venga boso mes, stimá nan, ma laga lugá pa e furia di Dios.