Richard Doornbosch

Skalo—Richard Doornbosch, no ta mira kontinuashon di e bolsa pa aseguradonan na Ennia komo un opshon. Esei ta lokual a keda presentá durante kombersashon den seno di Hunta di Minister djarason último. Segun informashon ku a yega Hunta di Minister, Doornbosch ta mira un deskontinuaidat komo un opshon mas probabel.

Deskontinuá ta nifiká pa presentá e bolsa di penshun na Ennia Caribe Leven riba merkado di benta. Konsekuentemente, kumpradónan interesá pa e bolsa por negoshá pa un deskuento di e bolsa kual na su turno ta nifiká ménos penshun i pago mensual na e penshonadonan.  Téknikamente, esei por ta e mihó solushon a korto plaso, sin mester laga e kompania kore riesgo riba su liña di solbabilidat peligrando demas bolsa di seguro manera “Schade” i “Ziekte”.

Djarason último despues ku Partidonan den Koalishon a keda sin tuma un desishon, Hunta di Minister a trata e Resolushon Ennia Leven. Ta trata di dos alternativa pa solushoná  e problema na Ennia, despues ku korte a ordená Hushang Ansary i eks direktornan pa repago di un sakeo bionario na 1.1 miar florin.  6 di Yüni próksimo, riba djamars un Tribunal di tres wes den Apelashon lo duna un di dos veredikto den e kaso prinsipal, miéntras den kortenan inferior i sivil tantu na Kòrsou komo internashonal tin mas ku 10 kaso mas andando.

E Resolushon pa Ennia ku ta riba mesa, no a tene na konsiderashon verediktonan pendiente den korte. Ekspertonan kende a traha e proposishon no a duna splikashon pa e omishon. Segun e komishon na momento opta pa deskontinuá e bolsa di penshun na Ennia, por kalkulá un pèrdida kolektivo di 20% riba e penshunnan. Aparte di risibi un pèrdida den balor di e penshunnan, e aktivonan na Ennia tambe lo hiba pèrdida den balor. Segun ekspertonan, si gobièrnu opta pa finansiá e pèrdida den balor di e penshunnan na Ennia, komunidat di Kòrsou tin di paga 1.3 miar durante un periodo di 25 aña. Esaki ta ekivalente na un promedio 51 mion florin anual. Ademas mester bini un fondo di kontribushon anual di kasi 20 mion florin. Ekspertonan a deskonsehá e ruta di deskontinuidat.

Pero e eksperto monetario na Banko Sentral, presidente direktor Richard Doornbosch a laga sa su reakshon riba e alternativa di deskontinuidat. Aparte di Doornbosch, den seno di Hunta di Minister tin mas desunion riba e proposishon ku a duna dos alternativa. Esta deskontinuá òf kontinuá. Entre otro Minister di Asuntunan Ekonómiko, Ruisandro Cijntje ta preferá pa Kòrsou tuma su tempu promé tuma desishonnan deskabeyá. E minister a splika durante nan reunion pa laga e desishon di korte bini, pa despues sigui evaluá. Segun e minister tin diferente faktor influyente riba e desishon.

Tantu den e alternativa di deskontinuá komo esun pa kontinuá, e komishon a proponé un asina yama Special Purpose Vehicle. Ta trata di un institushon manera ta e kaso na Giro, GSH. Den kaso na Ennia, e vehíkulo speshal ta keda enkargá ku maneho temporal  miéntras ta buska un kumpradó pa e parti di penshun.