Back to Top
Vigilante banner image

Prinsesa Amalia ta bishitá i sera konosí ku Kòrsou pa promé biaha


January 13, 2023 • 3 minüt pa lesa

Willemstad, —  Su Mahestat Rei, Su Mahestat Reina Maxima i su Altesa Real Prinsesa Amalia van Oranje ta yega Kòrsou djarason 1 di febrüari pròksimo. E komitiva Real ta yega ku barku. Nan ta nabega di Aruba pa Kòrsou riba ‘stationschip Zr. Ms. Holland’ i ta kompañá pa señora Van Huffelen, sekretario di estado enkargá ku asuntunan di Relashonnan den Reino i Digitalisashon.

E parti públiko di e bishta ta inisiá riba djaweps 2 di febrüari i ta terminá djabièrne 3 di febrüari. Lokual ta sentral durante e bishita aki ta enkuentronan i sera konosí ku habitantenan di Kòrsou. Kultura, naturalesa, pasado kolonial, deporte  tambe esfuersonan di Defensa lo ser tratá. Na bordo di e barku lo hiba un kombersashon tokante trabounan di Defensa den teritorio di Karibe, sigí pa un rekorido riba e barku i algun demostrashon. Ministerio di Defensa tin un kantidat di base den parti Karibense di Reino Hulandes i ta protehá e teritorio. Defensa ta partisipá den e lucha kontra transporte di droga, asistí den akshonnan di reskate riba laman i duna ouksilio na momento di orkan. Na yegada den Bahía di Santa Anna Gobernador Lucille George-Wout, Promé Minister Gilmar Pisas i Presidente di Parlamento Charetti America-Francisca lo saluda e komitiva Real.

Djaweps 2 di februari e bishita ta kuminsá kaminda ta kologá un kandal na “Punda Love Hart”. Despues ta sigi un paseo riba brùg di Ponton pa Brionplein. Na Brionplein Rei ta los e tiru pa duna inisio na inskripshon p’e Weganan di Rei (Koningsspelen). Muchanan di skolnan di fundeshi ta partisipa na e Weganan di Rei riba Brionplein. Despues e komitiva ta bishitá bario di Otrobanda kaminda nan lo kombersa ku habitantenan i artista i wak presentashonnan musikal. Merdía lo tin un lùnch ku outoridatnan di Kòrsou na Palasio di Gobernador.

Tra’i merdia e komitiva Real ta bishitá Punda i Scharloo. Na Punda Rei ta traha un moneda pa marka 25 aña ku Willemstad ta rekonosè pa UNESCO komo un Siudat di Patrimonio Mundial. Tambe famia Real ta fèrf un Chichi. Chichi ta un eskultura típiko di Kòrsou ku ta simbolisá e ruman muhé mayó ku ta karga sierto responsabilidatnan den su famia. Despues ta sigi un kaminata den bario di Scharloo ku arte di kaya, músika i proyektonan deportivo pa hobennan. E ronda ta kaba na Brùg Prinsesa Amalia, unda e komitiva Real por skucha e wals nobo ‘Wals Amalia’ komponé spesialmente pa e prinsesa.

Djaweps anochi tin un sena na Katedral de Sumpiña den kompanía di bintíun Yu di Kòrsou kende nan ta nifiká hopi pa e komunidat. E kantidat di invitado ta simbuló di e 21 aña di bida matrimonial ku Pareha Real ta selebrá riba e fecha ei.

Parti mainta riba djabièrne 3 di febrüari e komitiva Real ta bai Lanthùis Kenepa pa bishitá e eks plantashi kaminda Tula den 1795 a kuminsá ku e rebelion di katibu. Nan por mira un presentashon tokante e rebelion i ta papia ku desendientenan di personanan esklavisá. Despues ta sigi un bishita na Hòfi Mango, un eks plantashi di kaña pa traha suku ku awor ta un parke di naturalesa unda entre otro ta duna lès pa bira hofenir.

Parti mèrdia Rei, Reina Máxima i Prinsesa Amalia van Oranje ta presensiá na playa Cas Abao un presentashon di Sea Turtle Conservation i Dutch Caribbean Nature Alliance (DCNA) ku ta trata areanan marítimo protehá i preservashon di e populashon di turtuga.

Pa sera e bishita Real na Kòrsou e komitiva ta asistí na un anochi di Konsierto Musikal di Tumba ku presentashonnan karnavalesko riba Brionplein. E konsierto ta ser organisá na honor di defuntu Rei di Tumba Boy Dap.

Login