Javier Silvania.

Punda—Partidonan den Koalishon ta bai diskutí e proposishon riba  mesa pa yega na un solushon den debakel di Ennia. Esaki ta lokual Hunta di Minister a disidí ayera durante nan reunion. Minister Javier Silvania, kende tabata enkargá ku e komishon tambe a anunsiá e notisia riba su facebook ayera.

Ayera tabatin plania pa Gobièrnu di Kòrsou tuma un desishon riba un solushon pa Ennia Caribe Leven, prinsipalmente. Tabata opvio ku e reunion di ayera no tabata por a trata un tópiko asina importante den ousensia di diferente minister. Un komishon instalá pa minister di Finansas Javier Silvania, a pone dos opshon riba mesa pa solushoná problema di Ennia Caribe Holding, mas spesífiko Ennia Leven. E komishon di tres ta konsistí di Kelvin Kleist di Banko Sentral, Raymond Faneyte di SOAB i Miguel Jackson. E komishon a yega na dos solushon alternativo, unda unu lo kosta 1.2 miar florin, miéntras e otro lo kosta 600pa 700 mion florin.

Manera menshoná den artíkulonan anterior, Delloitte & Touche huntu ku aktuario internashonal Phenox a duna asistensha. Nan a yega na dos senario. Sea ta “run off” Ennia Caribe Leven of ta hasi un Kontinuashon Nobo, pa lora skapa e empresa di seguro mas grandi riba teritorio ulandes den Karibe. E desishon ta den man di Kabinete Pisas.  Javier Silvania a manda un karta na presidente direktor di CBCS, Richard Doornbosch. Segun e minister, a laga instalá un komishon di resolushon. E komishon a traha un rapòrt i  mester presentá esaki na Hunta di Minister pa un desishon. E desishon riba e rapòrt a keda posponé debí na ousensia di ministernan den eksterior. E dos senarionan presentá den e resolushon ta proponé pa fia sèn riba merkado di kapital finansiá e debakel riba solbabilidat di Ennia a konsekuensha di desishonnan den pasado pa permití grupo Ansary kometé un sakeo di 1.1 miar florin for Ennia Caribe Holding. E komishon ta papiando di dos senario. Den e senario di “run off”, ta kalkulá ku tenedónan di pólisa ta bai pèrdè hopi  nan derechinan riba penshun. E deskuento ta basá riba e situashon finansiero aktual na Ennia. Den e senario di Run Off, mester tene kuenta alabes ku e deskuento ku mester bini si akaso opta pa bende e aktivo (balorá na bolsa di penshun) i na kua preis esaki ta keda negoshá. Den e senario di Kontinuashon tin ménos konsekuensha, anke komunidat tei paga den e senario aki tambe. Pa kontinuá ku Ennia, e taha desaroyonan negativo, ekspertonan ta kalkulá un nesesidat di 700 mion florin na invershon. (atrobe no a konsiderá e claim di 1.1 miar riba grupo Ansary). E senario di Kontinuashon, manera menshoná ta mihó pero alabes mas kompliká pa ehekutá.

Prensa na St. Maarten ayera a kuminsá kuestioná si nan mester partisipá den kalke proposishon pa lokual ta trata e problema di Ennia i su solbabilidat. St, Maarten ya a ekspresá mediante un reunion di Parlamento di ke risibi bek nan derechinan riba e tereno di Mullet Bai. E tereno en kestion a keda desapropia for di Ansary mediante un desishon di Korte, pero Ansary ta apelando un desishon den korte. Mas aleu, St. Maarten lo no ta muchu tampoko pa uza reserva di Banko Sentral manera proponé pa e komishon di tres. Pa por skapa Ennia of deskontinuá e parti di penshun tei kosta e yu di Kòrsou entre 600 mion pa 1.2 miar florin.