Back to Top
Vigilante banner image

Problema entre Conoco Philips i PDVSA no ta solushoná


June 14, 2022 • 2 minüt pa lesa

Atento: Refineria di Kòrsou mester tene kuidou  i investigá posishon di Conoco Philips.

Isla—Aparte di retonan imponé pa organisashonnan ambiental, re-apertura di Refineria Isla lo konfrontá mas problema. Si un drùpel di krudo prosedente di PDVSA drenta Bahia Santa Ana, Conoco Philips, por bira un faktor. Segun relatonan internashonal, apesar di a purba, intermediarionan no a logra solushoná e konflikto entre e dos kompanianan.

 For di ougùstùs 2020, e kompania internashonal, Conoco Philips, a pone beslag riba tur depósito i tráfiko di krudo pa islanan karibense den reino. Esaki ta nifiká ku PDVSA por tin restrikshon di manda krudo Kòrsou. Ta trata di un desishon di korte ICSID (World Bank’s International Settlement of Investment Disputes) pa duna Conoco Philips derechi di pone beslag riba propiedatnan sirkulante i fiho di PDSVA. E desishon a lanta un ola di interes prosedente di mas kréditornan pa kleim 40 bion dòler di debe fo’i PDVSA. Te ku 2022, ainda PDVSA no a finalisá na kumpli.

Aparte di Conoco Philips tin mas kompania ku na 2020 a aktua kontra di propiedatnan di PDVSA na Kòrsou. Eks distribuidor di PDVSA, White Beach SNC LLC, tambe ta una. Na ougùstùs 2020,  den korte sivil di distrikto na New York, e kompania a entrega un keho di 25 mion dòler (U$)n kontra di PDVSA pa un retraso den pago di obligashon finansiero riba bolsa di invershon.  E problema a kuminsá for di 2007 despues ku eks presidente di Venezuela Hugo Chavez a nashonalisá hopi operashon na e pais. Un otro trayekto pa RdK te posibilidat pa Venezuela kuminsá “swap” nan petroli i manda e krudo brutu bek pa Kòrsou rafiná bou di otro doño. E posibilidat aki ta limitá, debí ku Conoco Philips, ta bon na altura di tur barku ku ta saliendo fo’i Venezuela ku krudo i den nan beslag nan tabata hopi spesífiko riba nan nòmber, kargamentu i fecha di depósito.

E restrikshonnan di Conoco Philips na 2020 a yega hopi leu. Den korte sivil a trata un petishon  di protesta unda tabatin indikashonnan bastante konkreto, ku Conoco Philips a laga pone hasta beslag riba pagonan ku Aqualectra mester hasi dirèkt òf sea indirekt na PDVSA, via di nan kompania yu na Kòrsou, Refineria Isla BV. Tambe Conoco a yega di pone beslag riba Curoil tambe. Aqualectra por ehèmpel, pa por skapa di Conoco, mester a entrega, mediante nan abogado Eric De Vries, un protesta riba petishon di imponé un beslag di tersera parti di Conoco Philips riba pagonan na Refineria Isla BV. Refineria Isla BV, ku ta un kompania yu di PDVSA,  i tabata entrega Aqualectra kombustibel i asfalt. Pa esaki, Aqualectra ta paga Refineria Isla BV dirèkt. No ta konosí di e PMO den eskoho di e sosio stratégiko a tene kuenta, si e bidder lo dependé di e krudo venezolano.

Login