A kuminsá ku bakuna kontra HPV na aña eskolar 2022/2023.

Willemstad- Ministerio di GMN ta duna di konosé ku e programa di bakunashon nashonal kontra di HPV lo baha gastunan médiko riba largo plaso.

Esaki tabata e kontesta di Ministerio di GMN riba pregunta di Parlamentario Ana Maria Pauletta. Parlamentario Pauletta a puntra si e Ministerio por konfirmá ku un programa di bakunashon nashonal kontra di HPV na largu tempu lo por baha gastunan médiko. E Ministerio ta konfirmá esaki debí ku na momentu ku bakuná kontra HPV e kasonan di kanser di boka di matris i tur sobrá manera lo baha drástikamente.

Minister di GMN, sra. Dorothy Janga,  ta debidamente na altura ku for di aña 2010 World Health Organization ta propagandá den nan strategia mundial pa eliminá HPV, bakunashon komo prevenshon primario pa asina por evitá kanser na boka di matris, vagina, vulva, penis, boka i garganta. Minister ta bisa ku lamentablemente pa motibunan finansiero Kòrsou no por a start ku e bakunashon mas trempan.

Den e aña eskolar 2022/2023, departamentu di salú hubenil a kuminsá ku bakunashon di muchanan nasé na aña 2013. Esaki lo ta pa tantu mucha muhé komo mucha hòmber. Na 2023 lo sigui ku e muchanan ku a nase aña 2014. E bakuna aki lo keda inkorporá den e trayekto regular di bakunashon pa mucha.

E grupo di enfoke di e departamento lo ta muchanan te a e edat di 18 aña. Lo hasi un inventarisashon riba mayornan ku yu riba e edat aki ku tambe ta deseá di bakuná. Di e manera aki por wak kiko ta e total di e gastunan i wak ku por kubri esakinan. Pa personanan entre 18 i 25 aña ta trahando riba esaki tambe pa wak kon i na unda lo ubiká e parti di bakunashon pa e mayor di edat. Departamentu Salú Hubenil ta hasi uso di e personal ku ta trahando aktualmente na e departamentu pa por pasa e bakunanan.