ORANJESTAD — Despues di e detenshon di parlamentario Benny Sevinger, Promé Minister demishonario a anunsia ku e lo entrega un keho penal kontra di Benny Sevinger i AVP pa “Smaad en Laster”

Ayera den oranan di mèrdia , Promé Minister demishonario señora Evelyn Wever-Croes a anunsiá riba página di Gobièrnu di Aruba ku e ta denunsiá mentiranan di Benny Sevinger i AVP. Esaki despues ku kandidato di Partido AVP Benny Sevinger via di un video publika riba pagina di AVP, a akusá señora Evelyn Wever-Croes di a bende e tereno di Waterpark pa 17 mion dòler.

Reakshon di e Promé Minister demishonario tabata lo siguiente: “Lokual ku mi ta lamentá ta ku den desesperashon e ta akusá ami di a bende un tereno pa 17 mion dòler. E akusashon aki ta totalmente falsu. Ami nunka tabata tin otro propiedat ku esun ku mi ta biba aden i nunka mi a bende ningun otro propiedat i sigur no un suma di plaka asina. Ademas, Benny Sevinger a wòrdu detené pa korupshon i si su úniko defensa ta pa akusá un otro hende, ta hopi tristu mes.”

“Ademas, si di bèrdat e tin un prueba kontra mi, puntra bo mes dikon nunka e mes no a entrega prueba. Bo sa dikon? Pasobra Sevinger sa ku e la gaña. Esaki ta simplemente un mentira mas. Ban wak ta ku kua mentira nan ta bini kuné mañan.” Esaki ta lokual Promé Minister demishonario di Aruba a duna di konosé.