Bahia di Amuay, Venezuela

Bullenbaai– Ayera den oranan di atardi, e promé tènker di krudo a yega Kòrsou. Ta trata di e tankero COLON nabegando bou di bandera di Togo.

COLON, un tènkero di 250 meter largu, segun informashon riba Internet a yega for di bahia Amuay Venezuela. Na Amuay tin un refineria ubika riba e peninsula di Paraguana na Venezuela. Ta trata di unu di e refinerianan mas grandi na mundu ku un kapasidat di 630.000 barí diario. Venezuela tabata proveé kasi 13% di produktonan petrolero na Estados Unidos promé di e embargo.

Siman pasá Vigilante a apuntá ku Bullenbaai a kuminsa mobilisá. Esaki a bin sali na kla despues ku algun èks empleadonan di PDVSA mester a mèldu na trabou. Den seno di Refineria di Kòrsou e informe a keda desmentí pero ayera ta konfirmá ku Bullenbaai a kuminsá move.

Ayera, e kompania Caribbean Petroleum Refinery a konfirmá e notisia via di un komunikado. Unda nan a bisa ku Bullenbaai tin un kapasidat pa almasená 4.1 mion barí di krudo, 2.4 mion barí di gasolin i 350 mil barí di gasoil. No por a keda konfirmá si e “fuel oil” den Colon tabata prosedente di Venezuela.

Te ainda tin embargo Estado Unidense riba krudo i kombustibel venezolano. Te ainda ta e kompanianan Repsol i EniSpa tin outorisashon pa tráfika krudo venezolano.