WILLEMSTAD – Di 23 mil aangifte impuesto di entrada (inkomstenbelasting) entregá pa aña 2020, 14 mil lo keda prosesá outomátikamente otro luna. I tambe lo tin un tranche di mil aangifte pa loke ta trata aña 2019. Esaki ta loke e rapòrt mensual di Servisio di Impuesto (belastingdienst) di luna mart ta indiká.

E rapòrt a keda publiká ayera. Den esaki tin desaroyo di realisashon dje metanan ku  minister di Finansa Javier Silvania a stipulá pa belastingdienst pa e aña aki. E organisashon aki ta presta hopi bon pa loke ta trata realisashon di ganashinan di impuesto. Manera indiká anteriormente, den e promé kuartal e ganashi tabata muchu mas haltu ku presupuestá. Ta trata aki di 39.2 mion florin, ku ta 12% mas haltu.

Pero tòg e organisashon tin retonan atministrativo ketu bai. Te ainda no a pone èkstra personal temporal pa traha riba e retrasonan atministrativo. Stichting Belastingaccountantsbureau (SBAB) resientemente si a haña yudansa pa kuminsá traha riba e kartanan di opheshon, paso aktualmente nan mes no tin e kapasidat pa redusí e kantidat di kartanan. Ademas tantu SBAB komo Belastingdienst Caribisch Nederland (BCN) lo bai duna sosten den limpiesa i aktualisashon dje atministrashon básiko, e asina yamá CRIB.

Tin progreso den e ponementu di aanslag pa impuesto riba tereno propio (onroerendezaakbelasting, OZB). Luna pasá a pone 54.500 aanslag pa loke ta trata e añanan 2019 te ku 2020. Esaki ta kasi igual na e kantidat di aanslag ku a keda poné durante henter un aña di impuesto.

Otro luna lo manda un karta rekordatorio pa tur dunadó di trabou ku no a entregá e deklarashon kolektivo di salarionan pa loke ta trata 2021, esta e asina yamá verzamelloonstaat. Na final di yüni lo kuminsá duna but riba aanslag si e dunadónan di trabou ainda no a hasi esaki. “Un yamada pues na dunadónan di trabou pa entregá e deklarashonnan aki mas lihé posibel online, pa evitá but. Dor di entregá esakinan na tempu, Belastingdienst por prosesá tur aangifte pa inkomstenbelasting mas lihé.”

E verzamelloonstaat dje dunadó di trabou ta kontené e informashon kontrali nesesario pa por kontrolá e informashon den e aangifte di inkomstenbelasting outomátikamente. “P’esei e preshon riba dunadónan di trabou pa entregá tur informashon mas lihé posibel.”

Servisio di Impuesto ta preparando pa otro luna mes manda mas tantu aanslag posibel di impuesto di entreda pa loke ta trata 2020. Esaki lo sòru pa pagadónan di impuesto haña nan restitushon. “E rapòrt ta menshoná ku dje 23 mil aangifte inkomstenbelasting ku te ainda a keda entregá pa aña di impuesto 2020, 14 mil sigur lo keda prosesá outomátikamente den mei, i ku alabes lo tin un tranche di mil aangifte pa aña 2019.”

Ademas e rapòrt ta menshoná ku a logra eliminá tur retraso den ponementu di aanslag mensual di impuesto riba ingreso i salario (omzetbelasting i loonbelasting) i ku tur aanslag di yanüari a keda poné den mart. “Pago na tempu di tur rendimentu mensual ta esensial pues pa evitá ku ta haña but pa pago atrasá.”

E rapòrt ta analisá alabes den mas detaye e grandura aktual dje archivo di kobransa, ku na final di mart tabatin un balor di 5.5 bion florin, konsistiendo di mas di 2.6 mion florin na aanslag repartí entre 130 mil pagadó di impuesto (tantu persona físiko, komo hurídiko, esta natuurlijke personen i rechtspersonen).

Ademas a inkluí den e rapòrt un análisis dje archivo di kobransa pa loke ta trata fecha di vensementu. Segun Servisio di Impuesto, pa por logra un proseso di kobransa kontrolá, mester realisá un limpiesa intensivo dje archivo di kobransa. Ya a desaroyá un serie di inisiativa ku e meta aki. I den mei aki Servisio di Impuesto lo formulá un atendimentu integral. Tambe lo proponé na minister pa limpia e archivo di kobransa di manera responsabel, i asina oumentá e efikasia di kobransa.

“Den poko palabra, por afirmá ku tin progreso pa loke ta trata realisashon dje metanan, pero ku tambe te ainda tin hopi reto pa logra realisá tur meta den 2022.”