Dr. Jerry Semper i Javier Silvania a kuminsá traha riba e proyekto pa yega na un HAP.

PIETERMAAI—Pronto un Tim di Trabou, instalá pa Ministerio di Salubridat Públiko ta kuminsá traha riba e pòst pa médikonan di kas na CMC, e asina yamá HAP.

Manera ta konosí, minister di Finansas i alabes minister interino di Salubridat Públiko, Javier Silvania, a pre finansiá e kostonan pa kore warda pa e médikonan di kas ku 1.8 mion florin. Entrante 1 di yanüari 2024 tambe ta yega na un HAP, esta un Pòst di Warda pa médikonan trahando for di orarionan normal den forma di warda. E médikonan tin hopi aña ta tratando na yega na un pòst sin ningun éksito. E médikonan, a opta pa pone kondishonnan pa entrante 4 aprel próksimo tin un solushon. Pero gobièrnu a logra firma ku e asosashon di médikonan di kas promé ku e fecha. Aparte di a firma, a traha tambe riba un Grupo di Trabou unda a inkorporá GMN, Finansas Públiko i Médikonan di Kas huntu ku CMC, Curaçao Medical Center. E Grupo di Trabou mester bai traha huntu awor pa por solushoná e problema ku e médikonan di kas ta konfrontando. E minister a sigui duna tambe e benefishinan di un pòst pa e médikonan. Entre otro na momento un persona bira malu e no mester yama su médiko di kas sino mester akudí na e pòst. E promé kontaktonan a inisiá pa establesé e Grupo di Trabou.

Jerry Semper representando e médikonan di kas,  a mustra nan gratitut pa e inisiativa di gobièrnu di yega na un solushon. Semper a enfatisá riba e importansha di tin un warda sentral pa atendé pashènt i duna pueblo un mihó servisio.