Nieuwe Haven— Korte a trata kaso kontra di e dama Y.N.T kende tabata propietario di un bar unda ku tabatin ‘trago meisjes’, e dama a indiká ku su bar tabata mas será ku e tabata habri i p’esei no por ta posibel ku su bar por a trese un ganashi di alrededor di Naf. 500 Mil florin.

Ta trata aki di un kaso unda ku hustisia ta persiguí e dama aki despues di tur e tempu ku e tabata propietario di bar no a hasi e pago nan stipulá na Belastingkantoor. Esaki miéntras ku Ministerio Públiko a hasi un kalkulashon di ku e dama a tabatin un ganashi di Naf. 532.571.20 i tòg no a hasi e pago nan stipulá na belasting etc. E dama a indiká ayera durante tratamentu di su kaso ku e ganashi ku e tabatin tabata yega nèt pa e paga e ‘trago meisje’ nan i tambe pa paga e hür i ta sobra nèt untiki sèn pa e mes drai kune.

Esaki paso Meo tabata bai sera su lugá i esaki ta keda mas sera ku esaki tabata keda habri mes. Tambe e la indiká ku den banda di su bar tabatin un chines ku tabata trèk tur e klientenan i ku p’esei e no tabata haña kliente fásil. E la splika ku e mes tabata biba ku tur e ‘trago meisje’ nan aki pero aparte di esei e mester a duna nan sèn pa asina nan por a manda pa nan famia. Tabatin algun di e dama nan aki ku no tabata keda serka dje pero tabata keda otro kaminda i e mester a paga esei tambe p’esei tur su ganashi tabata bai na tur esaki nan. E dama a splika ku for di momentu ku e la keda detené ku e la sali bèk e la hañ’e ta bende su kas na Venezuela pa asina e por a sigui drai.

P’esei e la pidi wes ku si wes por a anulá e petishon di pago mirando ku na e momentu nan aki e no ta den su mihó pa por paga e suma grandi ku ta wòrdu pidi. E akusado tabatin abogado mr. S.A.T. Ayubi- Haakmeester pa hiba su defensa. Wes a indiká ku e lo bai evaluá e situashon i lo dikta sentensia dia 31 i Mei benidero.