Huntu: Chong huntu ku Larmonie su na man robes firmando Akuerdo di Gobernashon 30 aprel último.

Punda—Ramon Chong awe no tin un reunion ku gobernadó Lucille George Wout, miéntras ku su proseso komo kandidato minister pa Asuntunan Ekonómiko ta sigui normal. Un reakshon ayera e prospekto minister no tabata kier a duna,  anke rumornan ta indikativo ku tin prekupashon den e tolda bèrdè.

Den transkurso di ayera atardi, tabatin diferente rumor sirkulando ku tantu Ramon Chong komo Eduard Braam awe mainta a keda na bishita Gobernadó, lokual ta un prosedura fuera di normal. Pero pa lokual ta trata Ramon Chong esei no ta e kaso. Vigilante por a komprondé ku kandidato minister Eduard Braam,  si a traha un sita awe mainta ku gobernadó pa aklarashon i interkambio di informashon. Vigilante a trata na yama Braam riba un number di telefon pero e no tabata alkansabel.

Den seno di PNP ayera tabatin bastante tenshon. Manera ta konosí ku parlamentarionan públikamente a afirmá di duna Chong sosten pero ta pendiente resultado di screening. Mas aleu, formadó Chester Peterson no a tende nada di gobernadó si en bèrdat tin duda riba postulashon di Chong lokual ta nifiká e proseso di Chong ta kanando. Pa lokual ta trata e proseso di screening, esaki lo tuma su tempu i no a finalisá ainda.