Parke Wilhelima: mañan mainta protesta den parke.

Punda—Awe mainta riba Wilhelminaplein un grupo di venezolano ta protesta aresto di dos paisano di nan. E dos hòmbernan a keda detené durante un kòntròl di tráfiko. Segun e grupo oponente, ta trata di hende korekto i hasta unu di nan ta un lider deportivo importante.

E dama Natalia Josefina Molina Rodriquez, ayera a emití un komunikado di prensa unda e protesta e proseder di outoridat lokal. Segun e komunikado, funshonarionan di Imigrashon a trapa riba derechi di su kompatriotanan. Segun Rodriquez e diskurso di gobièrnu lokal pa integrá e komunidat venezolano na Kòrsou ta puramente un mentira. E aresto di djamars último no tabata nada mas ku un muestra di menospresio. E ta bisa ta basta awor pa pone sinti komo delinkuente den kayanan di Kòrsou. No ta pasobra no tin dokumentashon mester trata nan asina. E al duna di konosé, hopi biaha ta mal funshonamentu na Imigrashon mes ta pone ku hopi venezolano ta sin dokumento.

Rodriquez ta bisa ku yunan di Kòrsou tambe tabatin mal eksperensha den pasado di a keda maltratá i humiá. Hasta ta yamando nan komo ILEGAL den medionan di komunikashon. E ta yama pa grita pa un BASTA di pone diskursonan bunita i dòbel nifikashon.