Minister Hato na klousura di e proyekto di Twinning pa personal di SDKK

WILLEMSTAD,– Resientemente Minister Hato tabata presente na e klousura di e proyekto di Twinning pa personal di SDKK. Den su totalidat ta e intenshon pa den e proyekto aki trahadónan di SDKK hasi interkambio pa pasa konosementu i eksperensia over pa nan kompañeronan na di KIA na Aruba, Point Blanche Prison na Sint Maarten i JICN na Boneiru.

Pa aworakí a skohe JICN na Boneiru kual ta e prizòn den Karibe ku e stándart di Hulanda komo e promé stap pa asina trahadónan di diferente prizòn den Reino Karibense konosé e métodonan di traha den e instituto aki.
Den kuadro di resosialisashon di klientenan den sentronan penitensiario ta importante pa tin un bon kultura i esfera di trabou pa e personal. E proyekto di Twinning ta asistí den esaki dor di laga trahadónan sera konosí ku ‘’best practices’’ di otro institutonan di forma ku nan por apliká esaki den práktika na nan propio trabou. Esaki ta netamente e motibu pa kual Minister a akordá e proyekto aki i aloká fondo for di Crime Fonds pa asina finansiá e proyekto di Twinning.
E meta di e proyekto di Twinning ta pa mehorá e sentro penitensiario di Kòrsou i krea uniformidat den e institutonan den Reino Hulandes. Tambe ta hopi esensial pa krea kolaborashon duradero pa sigui motivá nos trahadónan den SDKK.
Mirando e retonan ku nos ta konfrontá den e kadena hudisial i na SDKK proyektonan asin’aki ta hopi importante pa profeshonalisá nos hendenan aún mas pa nan por brinda un mihó servisio na nos klientenan. E partisipantenan tabata sumamente agradesido pa e oportunidat aki i por sigui konta ku sosten di Minister Hato pa ku proyektonan di interkambio di konosementu.