Minister Cijntje

WILLEMSTAD — Ministerio di Desaroyo Ekonómiko (MEO) a krea un aplikashon ku pueblo por usa pa kompará preis di diferente komestibel i otro produktonan di nesesidat den supermerkado i minimarketnan.

E meta ta pa krea konkurensia bou di komersiantenan, ku lo por kondusí na redukshon di preis di kuminda i otro produktonan di promé nesesidat. Esaki Minister di MEO, Ruisandro Cijntje a kontestá Parlamentario Sheldry Osepa di frakshon di PNP riba ocho preguntanan ku ela hasi na komienso di luna pasá, tokante maneho di gobièrnu relashoná ku konsumo di karni i preis di karni.

MEO den koperashon estrecho ku e Ministerio di Salubridat, Medio Ambiente i Naturalesa (SMN, GMN), ta trahando tambe riba un proyekto di agrikultura, ku e intenshon pa mehorá e kondishonnan pa agrikultura na Kòrsou, manera entre otro gastu di produkshon, fasilitá entrega di tereno pa agrikultura i fiansa ku interes abou. E meta di e proyekto piloto ta pa e sektor di agrikultura prosperá. Segun Minister Cijntje, komo ku produkshon lokal tin ménos influensia di faktornan eksterno, ta di hopi importansia pa alsa produkshon lokal, pa asina por pone produktonan di miho kalidat i mihó preis riba merkado.

Na promé lugá Parlamentario Osepa tabata ke sa dje Minister, kiko ta e plan di gobièrnu pa mantené e preis di kuminda barata di kua preis di karni i tambe preis di alternativa pa karni. Minister Cijntje: “Promé ku mi kontestá e pregunta akí, mi mester menshoná ku e problema di inflashon altu riba kuminda, ta algu mundial komo konsekuensia di entre otro e efektonan di e pandemia di COVID-19 i spesialmente e guera entre Rusia i Ukraina. Rusia i Ukraina ta dos di e regionnan ku produkshon mas grandi di entre otro: grano, ku ta usa pa tantu konsumo di hende komo bestia; i fertilisante, ku ta usa pa plantashon di kuminda di hende i bestia.”

Pa purba kontradesí e subida di preis di kuminda, MEO ta ehekutando e siguiente trayektonan: e proyekto Prijs Publicatie Applicatie (PPA) i Makutu Básiko Smart Card. MEO a krea un aplikashon (ku aktualmente ta den e fase di tèst) ku ta hasi posibel pa públiko por hasi komparashon di preis di diferente komestibel i otro produktonan di promé nesesidat den supermerkado i minimarket. “MEO ta hasi esaki pa alsa e nivel di konkurensia i konsientisashon di kompra. Esaki ta wòrdu hasí ku e meta pa krea kompetensia bou di komersiantenan ku ta bende komestibel i otro produktonan di promé nesesidat. Mas konkurensia por nifiká un posibel redukshon di e preisnan riba merkado lokal.”

E Makutu Básiko Smart Card lo sirbi komo un karchi pa duna deskuento riba komestibel i otro produktonan di promé nesesidat na personanan di ménos rekurso. E deskuento lo pone ku e grupo di enfoke di esnan di ménos rekurso lo por haña mam komestibel na un mihó preis. “Ya MEO tabatin kòmbersashon ku sektor privá riba e idea akí i nan a haña esaki un bon idea.”