Willemstad——— Den su afán pa duna un kontribushon positivo na e hornada di su empleadonan i klientenan i agregá balor na nan bida, PSB Bank resientemente a skohe luna di mart komo su luna dediká na salú bou di e lema Spar bo Salú.

E pensamentu di e gerensia di PSB Bank ta: “Nos ta bon ora nos tur ta bon”. Bon pa gerensia no ta limitá na kondishon finansiero sano so. Un bida salú ta mesun importante ku bienestar finansiero i situashon finansiero ta impaktá salú. Ku e programa Spar bo Salú PSB Bank ke duna un aporte na salú di su empleadonan i klientenan.

Pa empleadonan, durante hinter luna di Mart empleadonan ta hañando guia kon atendé ku nan salú. E programa a kuminsá ku eksaminashon di nan kondishon. Despues nan a haña varios charla i guia den área di nutrishon, salú mental i ehersisio.

Pa su klientenan PSB Bank lo tin dos aktividat.  Entre 20 i 24 di Mart klientenan por pasa na ofisina di PSB Bank na Goisco, di 8:00’or di mainta pa 12:00’or di mèrdia pa midi peso, suku i preshon serka profesionalnan di Lab de Med. 

Dia 25 di Mart PSB Bank ta organisá un seminario enfoká riba  salú mental, físiko i finansiero titulá “ Spar bo Salu” grátis spesial pa su klientenan. Klientenan por registrá via di e rètnan sosial di PSB Bank promé ku 22 di Mart pa partisipá den un sorteo elektróniko i haña oportunidat pa partisipá den e evento aki. 

Sigui e rètnan sosial di PSB Bank pa asina bo keda debidamente informá di tur e detayenan rondó di e aktividatnan en konekshon ku e luna di Salú i risibí tips balioso pa adoptá un estilo di bida mas  saludabel.