WILLENSTAD,—-Tabata ayera ku a sali un artíkulo den Korant Vigilante tokante ku kosedó nan ku ainda no a kaba di haña pago nan di trabou nan ku nan a hasi pa loke ta trata temporada di Karnaval tras di lomba.

Ta asina ku ayera durante di dia Vigilante Farándula a hañá algun yamada kaminda ku kosedó nan ta a duna di konosé ku danki pa e artíkulo ku a sali den korant Vigilante paso esaki a pone ku algun persona a reakshoná i trese loke ku a nan mester a trese. Asta nan a bisa ku tin algun persona ku a hasi mitar pago i a primintí ku pa otro siman nan lo trese e otro parti di pago.

Esaki sigur ta un bon notisia,paso e kosedó nan a hasi nan trabou for di aña pasa i tambe e aña aki nan tabata kose ainda pa algun grupo di Karnaval. Awor ta di ban spera ku pa otro siman tur hende kaba di kumpli pa asina e kosedó nan tambe ta kontentu ku porfin nan a haña nan pago.

Vigilante Farándula a keda pone na altura ku ya tin algun kosedó ku a kuminsá ku trabou nan kaba pa loke ta trata karnaval 2025.Pues si ainda tin grupo nan di karnaval ku tin debe habri hasi lihé boso bai likidá bo debe. Pa asina manera ku bo tela nan yega Kòrsou bo tin kara pa yega serka shon kosedó sin niun problema.