WILLEMSTAD, 16 di Yanüari 2025 – Q-Con Quality Construction N.V., un kompania di famia ku mas di 30 aña di eksperensia den konstrukshon, a tuma un paso importante pa salbaguardiá futuro finansiero di su trahadónan. Despues di un konseho independiente di broker BSmart, e kompania a skohe pa un areglo di penshun kolektivo di Assuria, e kompania di seguro nobo riba merkado di Kòrsou.
Q-Con Quality Construction N.V. semper tabata komprometé na ofresé kondishonnan di trabou ekselente na su empleadonan i resientemente a disidí pa huntu ku BSmart buska e mihó solushon posibel pa penshun. Ku bista riba stabilidat, solvabilidat i konfiabilidat, Assuria a resultá e partner ideal.
“E kondishonnan di merkado aktual a mehorá kresementu di e industria di konstrukshon i nos ta keda komprometé nos mes na ofresé nos klientenan e mihó kalidat, i alabes kuida nos empleadonan ku nos ta apresiá hopi”, asina e bosero di Q-Con Quality Construction N.V. a duna di konosé. “Nos ta spera di por tin un kolaborashon largu i sostenibel ku Assuria.”
Assuria, ku ta aktivo na Sürnam, Guyana i Trinidad, a ekspandé su aktividatnan na Kòrsou for di òktober 2023. Ku un historia di mas di 130 aña di eksperensia riba tereno di penshun, seguro di bida i mas, Assuria ta ofresé kompanianan solushonnan sólido i konfiabel. Ku un portafolio amplio di solushonnan pa penshun kolektivo, Assuria ta kla pa brinda sosten na kompanianan ora ta trata di seguridat finansiero pa nan empleadonan.
“Nos ta orguyoso di e konfiansa ku Q-Con Quality Construction N.V. a duna nos”, asina Elsirha Isenia-Scope, Managing Director di Assuria Curaçao a indiká. “Nos areglonan di penshun kolektivo ta reflehá nos balornan sentral – ku ta integridat, inovashon, ekspertisio i enfoke i kuido na kliente – i ta diseñá pa sostené kompanianan manera Q-Con den nan ambishon pa brinda seguridat finansiero i bienestar na nan trahadónan.”