WILLEMSTAD,—-Na fin di 2019 kantante, outor di letra i kompositor Gilbert ‘Dibo D’ Doran i pianista, kompositor i areglista Randal Corsen a pone e base pa un proyekto musikal nobo ku nan a duna e nòmber ‘Muzik sin Barera’.

 Esaki ta reflehá presis loke nan ke logra, esta krea algu nobo basá riba un diversidat di elemento di músika di Kòrsou ku ei mes un lugá spesial pa Papiamentu. Ku sosten finansiero di Prins Bernhard Cultuurfonds e sineasta Selwyn de Wind a registrá kon den kuadro di e proyekto aki a realisá e produkshonnan, pero tambe kon tantu Dibo-D komo Randal Corsen a krese te yega aya.

For di e konsierto pa 100 aña MCB na 2016 Dibo-D i Randal Corsen eksitosamente ta traha huntu na diferente proyekto i produkshon. E proyekto komun ‘Muzik sin Barera’ ta konsistí di vários tema; algun original di Dibo i Randal mes, pero tambe algun klásiko, manera di Rudy Plaate i poesia di Dibo-D  su defuntu abuelo Gilberto “Bèti” Doran poné na muzik. Pa esei Dibo-D i Randal a meskla influensianan di músika popular ku músika kontemporáneo, loke a produsí un zonidu refreskante i nobo, esta un meskla di ritmonan di Kòrsou ku músika klásiko, jazz, latin, Urban i pòp.

Parti di e grabashonnan, manera e parti di e instrumentonan di arko, a tuma lugá den e prestigioso Power Sound Studios na Amsterdam, frekuentá pa artista renombrá Hulandes i internashonal. Ku kolaborashon di Slick, produktor di urban, i di diferente músiko lokal a kompletá e grabashonnan aki na Kòrsou den Source Recording Studio. For di e proyekto aki anteriormente a resultá ‘Willemstad’ i ‘Lanta Bèk’.

Estreno

E dokumental ta splika kon tantu Randal Corsen komo Dibo Doran for di chikitu a lanta den muzik. E koperashon di e duo aki ta stimulá ámbos kada biaha bai un nivel mas haltu den nan desaroyo ku produkshonnan musikal impreshonante komo resultado. Dia 2 di aprel, Bièrnè Santu den ‘LockDown’, TeleCuraçao tin e estreno di e dokumental, ku despues di tempu lo aparesé tambe den e plataforma TAYA.tv i riba e PlayGo app di Digicel.