Raymond Gradus a bisa ku e ta mira atras riba añanan emoshonante i intensivo komo supervisor di e islanan i paisnan di èks-Antia Hulandes.

Willemstad,– Prof. dr. Raymond Gradus ta renunsiá entrante dia 1 di febrüari 2023 komo presidente di Kolegio di Supervishon Finansiero di Kòrsou i Sint Maarten, Kolegio di supervishon finansiero di Boneiru, Sint Eustatius i Saba i Kolegio di supervishon finansiero di Aruba. Ku esaki su di dos tèrmino ta finalisá un poko mas promé ku e fecha riba kual e mester a ekspirá, esta dia 1 di yüli 2023.

Ta for di momento ku “politiek Den Haag” a kuminsá evaluá pa  duna Aruba su gusto i laga CAft kai, ku e opshon di posibel retiru a subi mesa. Gradus lo a laga sa na e polítikonan ku e no ta polítiko i ku a busk’é pa hasi un trabou di supervishon finansiero. Awor, si ta bai hunga polítika ku “ e asuntu serio aki”, anto definitivamente e no lo ta parti di e wega aki. Fuentenan yegá na e relashon entre polítika i CAft a kanta e asuntu aki adelantá, pero parse ku for di Den Haag i Oranjestad a opta pa tòg sigui e baile, pero awor Gradus a disidí di saka stèker i ata muzik a stòp tambe.

E debate pa Aruba kumpli
Tur kos ta sintá rondó di e echo ku na yüni kaba, despues ku Minister di Finansa, mr. Xiomara Maduro ta ninga di kumpli ku e 13 rekomendashonnan di CAft riba presupuesto 2022, ku a konsehá pa duna Aruba un “aanwijzing”. A keda drai i rèk tempu, warda te fin di òktober, pa disidí pa no duna dicho instrukshon, ounke Aruba no a kumpli. Lokual si a sosodé ta ku dor di “meevallers” den forma di trabou efisiente i riguroso di DIMP na Aruba, ku a logra kobra èkstra impuesto i teniendo kuenta ku ekonomia (dor di turismo) ta mehorando, ku a drenta mas sèn di loke a spera den kaha di gobièrnu. A uza e “bon suerte” ei i Gobièrnu di Hulanda e ora ei a opta pa no duna “aanwijzing” mas. Pero konsekuentemente Raymond Gradus i CAft a pèrdè kara públikamente tambe i a bira opvio ku a skùif nan konseho un banda.

Vershon Raymond Gradus riba su retiro 5 luna promé
Raymond Gradus ta alabes katedrátiko di atministrashon i ekonomia di sektor públiko i sektor sin animo di lukro na Universidat Liber (VU) di Amsterdam. Kombinashon di e dos funshon nan menshoná ta un responsabilidat masha pisá, asina e ta menshoná. Ademas durante e lunanan binidero Gradus kier hasi vários biahe dirigí riba mundu akadémiko. E ta mira atras riba añanan emoshonante i intensivo komo supervisor di e islanan i paisnan di èks-Antia Hulandes. Aktualmente ta buskando un susesor apto, kende lo kuminsá entrante dia 1 di febrüari 2023.

Ken ta Raymond Gradus?
Prof. dr. Raymond Gradus ta presidente di Cft desde dia 1 di yüli 2017. Riba 1 di yüli 2020 a renombrá dr. Gradus pa un di dos periodo di tres aña. Banda di su funshon di katedrátiko e ta vinkulá tambe na Departamentu di Accounting di VU i na Sentro Zijlstra pa Kontròl Públiko, Liderazgo i Gobernashon (Zijlstra Center for Public Control, Leadership & Governance) i e ta miembro di nivel haltu di Instituto Tinbergen. Prof. Gradus tin vários publikashon sientífiko riba su nòmber tokante entre otro, seguridat sosial, gobièrnu, maneho di medio ambiente i finansa públiko. Ademas e ta presidente di e Komishon di Ouditorio di Konseho di Supervishon di Skol Superior di Den Haag (HHs).

Tokante CAft 
Riba dia 2 di sèptèmber 2015 a instituí College Aruba financieel toezicht (CAft), konosí tambe komo Kolegio di Supervishon Finansiero Aruba. Nan tarea ta enserá monitoria i duna konseho, riba adaptashon i ehekushon di presupuesto di pais Aruba, kedando den balansa i den e límitenan akordá, pa por kumpli ku pago di debenan. CAft por duna konseho sea ku Gobièrnu a pidi òf no. Kontrario na e otro paisnan den Reino Hulandes, pa Aruba ta aplikabel un norma di saldo di finansiamentu, pues e saldo presupuestario kitando e pago di e debe estatal. CAft ta konsistí di Raymond Gradus (Presidente), Hans Hoogervorst (postulá pa Hulanda)i Hellen van der Wal (postulá pa Aruba).