Back to Top
Vigilante banner image

Rebaho riba preis kasnan di pueblo pa falta di mantenshon


May 4, 2023 • 2 minüt pa lesa

Parlamentario Ana Maria Pauletta.

Willemstad, — Segun Parlamentario Ana Maria Pauletta ku na aña 1962 pais Kòrsou a tuma e desishon pa bende e kasnan di pueblo ( volkswoningen). E intenshon di e benta di e kasnan, tabata i ta promové ku e grupo di ménos rekurso finansiero por yega na su propio kas.

 Un desishon i vishon di maneho atmirabel i di aploudí. Teniendo kuenta ke e importansia di un kas propio den un ser humano su bida. Tin un kas propio ta alsa e sentido di seguridat i protekshon di un persona. Por medio di diferente dekreto, for di aña 1962, a formalisá kua ta e kasnan ku lo por bende i na kua preis lo bende esakinan. E kalkulashon di e preis tambe a keda formalisá. E pensamentu di e tempu ei tabata,  ku den un tempu rasonabel tur persona lo a kumpra e kasnan. Lo a logra e meta di tin un grupo di persona ku nan propio kas i  ku pais Kòrsou ku e fondonan rekoudá lo por a sigui traha mas kas pa e grupo di ménos rekurso.

Entretantu a pasa 61 aña, i ainda tin un kantidat di kas di Gobièrnu ku ta bini na remarke pa keda kumprá. Algun faktor a hunga un ròl durante e temporada ku a pasa, pa kual e kasnan no a keda bendé. Entre otro na inisio no tabatin informashon kla tokante e posibilidat pa yega na un hipotek, esta un fiansa pa kumpra e kasnan.  Un konsekuensia mas di e pasada di tempu, ta e echo ku mas tempu pasa, mas e preis di e kasnan subi. Esaki debí na e formulá ku a keda usá pa kalkulá e preis final di kasa kas.  Esaki ta pone ku kada bes ku e siudadano sera un sèn, pa por por kumpra e kas, e preis a subi, ku konsekuensia ku e ta kai chikí atrobe.

Den reunion di Parlamento, durante tratamentu di presupuesto 2023 minister Cooper a trese dilanti e deseo pa realmente resolvé e asuntu aki. Minister Cooper a pidi Parlamento su yudansa pa bin ku solushonnan konkreto ku por yuda.  Den kuadro di esaki,  tin e siguiente proposishon, miéntras nos ta warda e ministerio finalisá e trayekto di lei. Un solushon ku por drenta na vigor inmediatamente i ta duna alivio mesora na tur persona ku kier yega na nan propio kas. Ademas ku awor ku FFP lo por duna hipotek atrobe.

Ta proponé na minister pa hasi uso di e oportunidat ku e dekreto A.B. 1962 no.13, artíkulo 1. Esta duna un rekorte supstansial na tur kumpradó ku entregá nan petishon pa kompra. E intenshon di e rekorte aki ta stabilisá e preis di e kasnan na un montante definí pa e ministerio. Ku esaki ta logra ku e preis di e kas lo no varia mas.

  1. Minister ta di akuerdo ku e dekreto A.B. 1962  ta duna minister Cooper e oportunidat pa duna un rekorte riba e preis di kasnan?
  2. Minister ta dispuesto kuminsando for  1 di yüli , duna nan un rekorte pa mantené e preis di kas stabil pa tur e sobra kasnan ku ta poné pa bendé?
Login