Reclassering ta e promé punto di kontakto pa detenidonan kuminsá ku nan proseso di rehabilitá i integrá bèk den komunidat.

Nieuwe Haven,– Ma investigashon di reclassering ketubai ta pegá, kual ta stanka e proseso penal na momentu ku hues mester evaluá esaki.

Den e kaso penal kontra di e kuarteto ku ta traha riba pista di aeropuerto a resultá ku ainda dos investigashon di reclassering ketubai ta pendiente pa keda entregá. For di ougùstùs ta pidiendo pa e investigashon nan aki i awor ta resultando ku reclassering tin basta difikultat pa hasi e trabou.

Na e momentunan aki tin sufisiente informashon, kual alabes a keda konfirmá dor di vários fuente ku reclassering tin falta di personal. No ta konosí kuantu vakatura ta habrí den e organisashon i pakiko falta personal, pero echo ta ku e presentashon di e organisashon ta bai atras.

For di 2022 e problemanan aki a kuminsá bini dilanti kaminda abogadonan notabel a kuminsá splika ku e organisashon falta di fondo pa por presenta riba un nivel adekuá. Kaminda den pasado reclassering tabata por a ehekutá nan investigashon denter di 4 siman, awor esaki ta entre 6 pa 8 siman. Tambe ta notabel ku akusadonan ta lamentá kon nan no ta haña e guia adekuá sigur den nan periodo di pruebta, pero fuentenan ta agregá ku e falta di personal ta un dje problemanan prinsipal.

Reclassering ta e organisashon gubernamental ku tin komo meta pa evitá personanan ya kondená riba forma penal pa residivá i kai den e sírkulo visioso pa sigui kometé delitonan penal. Tambe e organisashon ta traha aktivamente riba reshabilitashon di èks detenidonan.

Pa 2025 gobièrnu a presupuestá 1.79 mion florin pa optimalisá e servisio di reclassering. Tambe ministerio di Hustisia a stipulá komo proyekto di prioridat pa yena diferente vacatura habrí den e organisashon.