Back to Top
Vigilante banner image

Refinashon di krudo na Kòrsou programá pa start na yüni próksimo


February 17, 2021 • 2 minüt pa lesa

Bista: for di 2017, Kòrsou no tabatin un bista di tankeronan mará  den haf.

Punda— Sin refinashon di krudo i sin re-aktivashon di turismo, Kòrsou lo sigui ópera sin su dos pilarnan mas importante pa su ekonomia. E kombinashon di refinashon i turismo ta perkurá pa riba 50% di nos Produkto Nashonal Brutu.

Si Refineria Isla no logra rafiná krudo durante 2021, Kòrsou ta den un problema serio. Efektonan tantu na nivel makro ekonómiko komo mikro ekonómiko lo ta devastador, okashonando puntonan di konflikto serio riba e isla. Merkado di konsumo lo sinti efekto serio i trese oumento den desempleo i mas migrashon pa Ulanda. Na Kòrsou, entrada di divisa for di aktividat di refinashon na refineria Isla a kuminsá kai pa motibu di ménos produkshon for di 2018 kompará. Durante 2019 i 2020 no tabatin produkshon na Refineria Isla. Esaki ta a konsekuensia di ménos suministro di krudo for di Venezuela. E beslag riba propiedatnan di PDVSA dor e kompanianan internashonal manera e.o. Conoco Phillips, Exotic Waves, Clion Limited, Ammon Shipping i ULM Blandford i awor instabilidat polítiko na Venezuela, a empeorá mas ainda nos entrada di divisa via aktividat petrolero. PDVSA tabata operá terminalnan na Kòrsou i ta eksportá krudo pa kliente nan na Estádos Unídos, Oropa i Asia. E tráfiko di krudo tabata krea empleo i trese divisas pa Kòrsou.

E beslagnan a difikultá prosesamentu di krudo na Kòrsou kombiná ku embargo internashonal. Na 2017, PDVSA a manda 132 tanki di krudo miéntras na 2018 e montante aki apénas a yega 17 barku miéntras 2019 i 2020 no tabatin krudo manera ya menshoná. Venezuela por lo pronto no ta un opshon pa trese krudo. Aparte di Conoco Philips, un seri di kompania ainda tin beslag riba krudo prosedente di Venezuela.  Kòrsou a bira un sentro hurídiko pa atendé ku e beslagnan imponé. Por ehèmpel kompanianan manera Exotic Waves Marine, Ammon Shipping, Clion Limited i ULM Blandford a yega di pone beslag di korte riba 350 bari di krudo den e tankero Icaro mará na Bullenbaai. Tipo di akshon nan asina aki kolektivamente ta afektá nos ekonomia. Segun Isla BV den korte, nan kalkulo ta indiká ku por lo ménos 15 mil persona lo wòrdu afektá si e refineria no sigui drai miéntras esaki ta stagna ekonomia di Kòrsou. E proseso di generá ekonomia for di Refineria Isla, tin dos aña stanká. Durante 2019 i 2020 a atribuí un oumento den importashon na prinsipalmente  produkto petrolero na Kòrsou pasobra mester bai kumpra produktonan petrolero kontra un kosto mas haltu serka otro suministradónan awor ku Refineria Isla ta inaktivo. Operadornan nobo ayera a konfirmá na Vigilante ku nan planifikashon ta sigui pa kuminsá drai na yüni próksimo.

Foto Krudo

Login