Patrick Newton

Willemstad ——- Refineria di Kòrsou (RdK) a tuma nota di un artíkulo ku resientemente a keda publiká pa Associated Press den kua ta kuestioná akshonnan tumá dor di RdK. Ta trata di e artíkulo ku ta indiká ku RdK tabata koperá pa evitá aplikashon di lei (di sankshon) Merikano ku ta regardá Venezuela.

No ta kustumber di RdK pa reakshoná riba publikashonnan ku ta toka su klientenan.  Sinembargo, den e kaso spesífiko aki ta importante pa aklará ku RdK i su supsidiario CRU ta aktua di akuerdo ku tur lei (di sankshon) na vigor. Banda di esaki RdK ta rekerí di tur kliente pa kumpli kompletamente ku e leinan aki.

E artikulo ku RDK ta referi na dje ta lo siguiente:    
Associated Press, e agensha di prensa internashonal ta akusá Kòrsou i Refineria di Kòrsou di a desviá i despistá areglonan di sanshon ku Venezuela. Segun un informe publiká pa e agensia, un kantidat di 600 mil ton di “fuel oil” a drenta Bullenbaai prosedente di Venezuela. Esaki ta un desvio for di e areglonan di sanshon.

Segun Patrick Newton, direktor di RdK, e kargamentu di 600 mil bari di fuel oil ku a yega Kòrsou for di Venezuela,  riba 28 di sèptèmber, tabatin lisensia di OFAC pa transbordá. Esaki ta lokual Patrick Newton direktor di Refineria di Kòrsou a konfirmá na Vigilante. “Di mes nos a chek tur esaki promé ku nos a akseptá e karga di fuel oil, Newton a duna di konosé na Vigilante, algun siman pasá. E deklarashon di Newton, ta kontradesí ponensianan di AP.

Djarason 28 di sèptèmber, pa 4’or di atardi, e botonan di tou Manta i Ola i e boto NC 6-L di Kompania di Tou Kòrsou (KTK) a guia e barku Colon pa mara na Bullenbaai Jetty-1.  E barku Colon a bini ku un karga di 600.000 barí di ‘fuel oil’ pa almasená na nos terminal. E barku a sali direkt for di Venezuela pa Korsou. Colon a trese e promé karga di produktonan petrolero pa almasená na Bullenbaai komo parti di e akuerdo entre CRU, e kompania supsidiario di Refineria di Kòrsou (RdK), kual ta permití Caribbean Petroleum Refinery (CPR) almasená produkto na e terminal di Bullenbaai. E akuerdo di almasenahe ta pará lòs for di e akuerdo di mas aña pa operashon di refineria i e terminal na Bullenbaai ku Refineria di Kòrsou i CPR ta negoshando aktualmente. E akuerdo ta enserá ku lo por almasená te ku 7 mion barí di produkto na e terminal.

CRU i RdK tabatin basta trabou di preparashon promé ku por a kuminsá risibí produkto pa almasenahe na Bullenbaai atrobe. COLON, un tènkero di 250 meter largu, segun informashon riba Internet a yega for di bahia Amuay Venezuela. Na Amuay tin un refineria ubika riba e península di Paraguana na Venezuela. Ta trata di unu di e refinerianan mas grandi na mundu ku un kapasidat di 630.000 barí diario. Venezuela tabata proveé kasi 13% di produktonan petrolero na Estádos Unídos promé di e embargo. Te ainda tin embargo Estado Unidense riba krudo i kombustibel venezolano. Te ainda ta e kompanianan Repsol i EniSpa tin outorisashon pa tráfika krudo venezolano.

Aparentemente e krudo riba e barku Colon tabatin lisensia di OFAC pa transbordá. OFAC ta nifiká Office of Foreign Assets Control. Ta trata di e agensia ku ta atministrá i kontrolá embargonan imponé pa gobièrnu estado unidense. E lisensia di OFAC ta outorisá eksepshon riba e embargo. Tin dos tipo di lisensia OFAC, unu partikular i unu general. No ta konosí bou di kual a transbordá e fuel oil pa Kòrsou.