WILLEMSTAD —— Refineria di Kòrsou (RDK) resientemente a informá  e tres partidonan ku a entregá un ‘binding proposal’ den e proseso ku tabata andando pa yega na un partner stratégiko pa manehá i operá e refineria i Bullenbaai, ku ta kulminá i sera e proseso ku nan a partisipá aden.

Esaki ta konforme e ‘process letter’ ku partidonan a bai di akuerdo kun’é unabes ku RdK a inisiá e proseso di selekshon. E proseso pa e buskeda pa un operadó i manehadó a kana debidamente konforme e loke a keda akordá for di inisio dor di Hunta di Akshonista i Hunta di Komisario di RdK, i konforme loke partidonan ku a partisipá na e proseso a bai di akuerdo ku’né den e ‘process letter’.

Esaki ta habri espasio pa RdK por inisiá un proseso nobo i aselerá di ‘headhunting’ pa yega na un partido pa manehá i operá nos refineria i Bullenbaai. RdK mientrastantu a inisiá e trámitenan pa mas pronto posibel inisiá e proseso pa yega na un operadó i manehadó pa e fasilidatnan petrolero di Kòrsou. E meta ta keda meskos, esta pa mas pronto habri e refineria di akuerdo ku e mandato di Gobièrnu.

RdK lo informá komunidat di desaroyonan segun e proseso pa e búskeda aselerá ta kanando.