Back to Top
Responsive image
E korant di pueblo

Despues di 20 aña Regis por haña banchi na Aprel


February 19, 2021 • 3 minüt pa lesa

Nieuwe Haven–  Korte a trata kaso ayera di e hòmber Regis Djaoen, unda tantu e komo su abogado mester a haña un kontesta di kon ta baiendo ku e trámite nan pa e por a bai kas. Regis Djaoen ta sintando un kastigu di bida largu, despues ku e lo mester a tira un bewaker na Gasora na aña 1999.

Regis tin un kantidat di 20 aña ku e ta sera kaba, i tabata for di aña 2019 ku Hof a disidí di kuminsá ku un investigashon pa asina wak si por laga Regis haña un chèns bek den komunidat.  E lastu biaha ku a trata e kaso korte a duna di konosé ku si SDKK no por yuda Regis ku resosialisashon tin ku pensa riba otro alternativa nan manera lag’é bai riba banchi ku un plan i tambe ku un persona pa gui’é den e proseso.

Hof ta tumando e situashon di Regis aki hopi na serio, paso ya tin basta tempu kaba ku e kaso aki ta andando i no ta yegando na un konklushon. Por a komprondé ku ya tin basta moveshon andando pa loke ta trata tur lokual ku a ordená tantu reclassering, e sikólogo i e direktor i managment di SDKK. Aña pasa no tabatin niun aktividat i esaki tabata en konekshon ku COVID-19 pues tabata imposibel pa e detenido por a resosialisá. Pero awor ku tur e medida nan a suavisá a kuminsá ku e plan di resosialisashon i tambe ta lagando Regis bai traha pafó di SDKK. I segun e managment di SDKK tur kos ta kanando hopi bon ku Regi, e ta teniendo su mes na regla i e ta kumpliendo ku tur lokual ku nan bisé ku e tin ku hasi.

Durante e tratamentu di e kaso lastu biaha wes mr. Carmelia, a puntra direktor di SDKK kiko tabata e motibu ku ta tardando tantu siña ku e situashon di banchi. I tabata na e momentu ei ku e la splika ku no tabatin banchi aktualmente i ku tabatin 18 persona riba e lista di warda banchi na SDKK. Riba e dia ei wes a bisé ku e mester a sòru pa Regis tabata te ariba pa por a risibí e banchi. Pero te dia di awe ainda Regis no a logra di haña e banchi ni tampoko por a kòmbersá ku un sikólogo. Regis falta un rapòrt di sikólogo i tambe e banchi pa asina por sali for di piskalat. Segun managment di SDKK ayera den sala di korte, nan tabatin problema ku ministerio di finansiá i pa e motibu aki no por a logra ku e asuntu di banchi. Nan a splika ku nan tabatin problema nan finansiero i ku ta Ministerio di finansiá mester a regla esaki pa nan por a haña e banchi nan.

Nan a splika ku awor aki nan lo haña banchi nobo den luna di Aprel, si tur kos kana segun plania. Wes a bisa ku e por a mira e rapòrt di reclassering i ta mira ku tur kos ta kanando bon ku Regis. Tambe e la bisa ku e por mira ku lo por tin oportunidat pa Regis kuminsá traha ku un kontratista den trabou nan di konstrukshon asina e kaba ku e proseso di resosialisashon ku tambe wes ta haña ta hopi bon. Pero wes a bisa loke ku e ta haña ta hopi laf ta ku ainda e no por a risibí un rapòrt di sikólogo. E sikólogo lo kuminsá ku Regis i pa aki 6 luna lo por traha un rapòrt pa por duna wes. Wes a bisa ya komo mester warda riba e rapòrt di e sikólogo i tambe mester warda banchi den luna di Aprel e lo pone un tratamentu den luna di Òktober ya asina e lo por tin un kontesta pa e akusado di kiko lo bai pasa den su kaso.

Login