Back to Top
Vigilante banner image

Reinard Curiel ta bai proseso di fondo kontra Ennia


April 12, 2023 • 3 minüt pa lesa

Reinard Curiel: proseso a fondo kontra di Ennia Caribe Holding.

Nieuwe haven– Reinald Curiel, eks direktor na Ennia Caribe Holding a kuminsá un demanda a fondo kontra di Ennia Caribe Holding. E kaso ta regardá retraso den un pago ku Ennia mester hasi despues di a yega na areglo ku Curiel. Den un wisio sumario, korte a dikta fayo kontra di Curiel.  Awor e proseso a bai den tratamentu a fondo. Su kompania Reynhoff BV tambe a inisiá e proseso kontra di Ennia.

Curiel ta unu dje  eks- direktornan ku a keda despues ku korte a permití Medida di Emergensha riba 6 kompania di e konsorsio. Na novèmber 2018, Maneho di Banko Sentral a anunsiá ku Jose Jardim huntu ku  Leslie Ann Brodie i Reinald Curiel ta trahando duru pa trese trankilidat rondó di e kompania. For di yüli 2018, Korte Sivil a dikta pa outorisá un medida di emergensha na Ennia. E medida a wòrdu anunsiá ofisialmente pa CBCS den medionan di komunikashon. Ademas CBCS a pone dos rueda di prensa pa anunsiá e situashon. Durante e proseso a anunsiá ku Curiel i Brodie lo ta enkargá ku maneho di e Ennia Caribe Holding i pa tur kliente tene nan trankilidat.

Durante e wisio sumario,  Reinald Curiel i su kompania Reynhoff BV no tabata por a kombensé wes mr. Pieter de Kort den nan demanda pa imponé un adelanto di 100 mil florin riba Ennia Caribe Holding . Den unu di su demandanan, Curiel a súplika korte pa obligá Ennia pag’é 100 mil florin komo “voorschot” riba un daño perwisio pendiente. Segun wes Pieter de Kort, korte no tin e kapasidat pa determiná si en bèrdat Ennia mester paga Reynoff BV un saldo di 100 mil florin. Tampoko korte den wisio sumario no por determiná si Reynhoof tambe a kobra di mas i debe Ennia. Pa por deskontá ámbos partido mester yega na un entendimentu segun de Kort. Pero den un wisio sumario esei no ta posibel, segun de Kort.  Curiel a opta pa inisiá un proseso a fondo. Curiel a súplika alabes kontinuashon di pago.

E problema entre Curiel i Ennia a inisiá despues di yüli 2018 ku Banko Sentral a imponé un medida di emergensha riba e kompania di seguro i retirá tur eks direktor. Curiel, kende tabata traha pa Ennia for di 2009, a yega na un kombenio nobo ku Ennia via su kompania Reynoff BV. Entre Ennia i Curiel ya tabatin un akuerdo ku na momento Curiel yega 62 aña e ta sigui duna Ennia servisio via di su kompania Reynoff. A surgi un diferensha di opinion entre e sumanan ku Ennia tabata paga Curiel durante servisio i pafó di servisio via su kompania. Segun Ennia, nan mester a paga Reynoff 46.300,- florin mensual miéntras Curiel esaki mester tabata 55.000,- florin. Despues di e medida di emergensha a sigui paga Curiel salario te ku medio 2019. Pues a surgi problema i a laga HBN Law saka un konseho. Pero no a hasi kaso di e konseho aló ménos pa lokual ta trata e rekargonan riba salario. HBN a kalkulá ku e periodo te ku yüli 2019, mester a paga Reynhoff un adaptashon di 108.615,- florin.

Pero durante tratamentunan a bini kálkulonan di ámbos partido unda Curiel ta yega na un suma di kasi 900 mil florin na ménos pago miéntras Ennia a argumentá ku e suma ta kasi 50% ménos di lokual Curiel ta papia di dje. Riba dje, Curiel ta claim kasi 24 luna di 5000 mil florin pa un “housing allowance” ku Ennia no tabata pagando. Segun Ennia, den e kálkulonan mester añadí e pagonan di interes riba fiansa ku Curiel tabatin serka e kompania.

Segun Banko Sentral bou di Curiel i Brodie e konfiabilidat den e kompaniá a bin bèk miéntras ta tumando tur e pasonan nesesario, tantu hurídiko komo finansiero pa trese konfiansa interno i eksterno na Ennia. E prekupashon mas serio tabata konsentrá rondó di Ennia Leven. Via di EC Investments aktivonan a sali yega na bankonan estado unidense unda Hushang Ansary doño di Ennia Caribe Holding, a invertí i kumpra kompanianan riba bolsa di balor. Segun Banko Sentral, gerensha di Ennia bou di Leslie Ann Brodie i Reinard Curiel tabata hasiendo nan máksimo huntu ku Jardim di CBCS pa tene Ennia su reputashon. Pero, entretantu Curiel tambe a bandoná Ennia Caribe Holding. Despues di su retiro a yega na un kombenio pero awor e kosnan a bin pega, pasobra Curiel a entamá un proseso di pago kontra di Ennia.

Login