Back to Top
Vigilante banner image

Representantenan di Schotte no ta komentá riba “akuerdo pafó di korte”


February 21, 2023 • 2 minüt pa lesa

Gerrit Schotte.

Punda—“No Comment”, tabata reakshon di Rutsel Martha ayera riba un posibel “out of court settlement” entre Gerrit Schotte i Ministerio Públiko.

Entre Schotte i Ministerio Públiko tabatin un negoshashon andando pafó di korte, despues ku Ministerio Públiko a sita Schotte pa paga 1.8 mion florin, pero Schotte tambe a manda un karta pa claim entre 4 pa 5 mion di daño okashoná pa Ministerio Públiko na su persona. Schotte for di 2019 ta bringando den korte sivil riba daño perwisio okashoná pa Ministerio Públiko debí na un inisio falsu di su persekushon penal. Schotte tabata den korte sostené pa abogado Lizaima da Costa Gomez i eksperto riba Leinan Internashonal i Sivil, dr. Rutsel Martha.

Schotte a kuminsá un claim kontra di Ministerio Públiko pa un suma deskonosí, anke tin indikashon di ta trata di 4.5 mion florin. Na vários okashon representante di Schotte, Rutsel Martha no a duna reakshon riba e suma pero no a desmentí tampoko. Schotte via ret sosial a konfirmá un areglo sin duna detaye.

E dos partidonan for di Yüni 2022 a reakshoná riba otro via pòstnan digital unda por konfirmá ku Gerrit Schotte a kontesta Ministerio Públiko riba nan karta na finalnan di Mei 2022. Aparte ku Ministerio Públiko tabatin un demanda di 1.8 mion florin riba Schotte ku konsekuensha penal, Schotte tambe a manda karta pa un demanda sivil kontra di gobièrnu di Kòrsou. I ta trata di por lo ménos 4.5 mion florin, unda tin indikashon ku Schotte ta fuerte pará den su sapatu durante e proseso di negoshashon. Manera ta konosí, den un prosedura sivil , Schotte tabata pendiente deklarashon di un fiskal italiano Robertico Pelicano. Abase di e deklarashon, tratamentu di  un petishon pa daño perwisio por a sigui. Esaki ta lokual e wes sivil ubiká na Aruba, mr Jaap Sap, a dikta den un veredikto sivil, despues ku Gerrit Schotte, a demandá  esaki den un súplika , kual súplika a keda tratá 18 di yanüari 2019. Pelicano entretantu a deklará unda a konkluí ku eks Prokurador General vd S., den su kaso a gaña i Schotte tin kaminda pa daño perwisio. Esaki por nifiká ku e inisio penal kontra di Schotte, no tabatin un inisio original manera Ministerio Públiko a presentá durante tratamentunan den promé Instansha.

Miéntras Ministerio Públiko a menasa Schotte pa paga 1.8 mion florin, Schotte di su banda a akusá gobièrnu di Kòrsou/Ministerio Públiko di prosedimentu ilegítimo durante nan persekushon. Segun Schotte, inisio di su persekushon ta basá riba motibunan polítiko i personal en bes di kousantenan penal. Pa tal motibu den su petishon sivil, e la súplika na korte mediante wes. Jaap Sap, pa ordená un testigu wòrdu interogá. Ta trata di e abogado general italiano  na distrikto di Milan Robertico Pelicano. Pelicano a desmentí deklarashonnan di vd S.

E eks lider polítiko di MFK a yega di entamá un demanda sivil pa logra haña daño perwisio despues ku informashon di Inteligensia (VDC/VNA) a bin lèk den prensa ulandes. Ta trata di un kaso ku ta den pasio for di 2014, promé ku Schotte su kondena a bira definitivo den kasashon. Schotte ta argumentá ku Ministerio Públiko ta kulpabel pa nan un memo di inteligensia a  lèk den prensa ulandes.

Login