2025: klaridat lo yega korte promé ku yüni próksimo.

Skalo—2025 ta bira interesante pa e problemátika di Ennia. Konforme e veredikto intermediario último den Korte di Apelashon, mester balotá Mullet Bay pa mira kuantu sèn mas òf ménos di 270 mion florin, grupo Ansary i eks direktornan mester paga.

Lokual e veredikto den Korte di Apelashon ta konkluí ku daño okashoná na Ennia no ta 1.2 miar florin sino 270 mion florin. Pa tal motibu, Korte a duna tarea pa bai balotá Mullet Bay, pasobra e balor di Mullet Bay ta determiná kuantu sèn grupo Ansary por a keda permití na saka for di Ennia Caribe Holding. Por ehèmpel, sin e balor di Mullet Bay resultá mas abou ku 270m mion florin, Grupo Ansary no mester paga mas i ta “akordá den korte ku e daño ta keda na 270 mion florin”. Pa kada florin riba 270 mion florin, Korte lo tuma un veredikto final kuantu porsentahe di e florin marginá riba 270 mion mester keda na responsabilidat pa Grupo Ansary paga. Pa tal motibu, esei tabata unu di e rasonnan dikon Banko Sentral i Ennia a súplika Korte di Apelashon pa bai Kasashon mesora, awor ku ta konosí ku e balor di Mullet Bay kisas lo no surpasá 270 mion florin.  Pa 2025, promé ku Yüni próksimo ta spera e kompania Collier entrega e rapòrt pa Mullet Bay, kual rapòrt lo kosta 75 mil dòler. E popular Resolushon Ennia, ainda no ta riba mesun liña ku Korte di Apelashon. Tin un diferensia di por lo ménos 800 mion florin na daño.

Entretantu, a kuestionando alabes si Ennia realmente ta den problema a korto plaso. Ennia Caribe Leven ta pagando por lo ménos un suma mensual di kasi 3.5 mion na penshonadonan. Ta trata di pagonan di entre 600 pa mas haltu ku 2 mil florin mensual. E pagonan na penshonado komo kota mensual ta totalisá 3.5 mion repartí riba alrededor 4.500 penshonado ku ta kobrando aktivo mensualmente. E grupo mas grandi, 60% di e penshonadonan ta kobra entre 0 pa 600 florin mensual.