Tur restorant ku ta disponé di un terasa òf fasilidat pa sinta kome pafó, lo por kuminsá risibí kliente atrobe entrante awe 4 di Mei.

Willemstad— Tur restorant ku ta disponé di un terasa òf fasilidat pa sinta kome pafó, lo por kuminsá risibí kliente atrobe entrante awe 4 di Mei. Pa loke ta trata trùknan di pan, esaki ta ku nan lo por ofresé servisio entre 4′ or di atardi pa 8′ or di anochi.

Durante Konferensha di Prensa ku Gobièrnu a tene ayera a keda anunsiá ku a hasi ahuste na e medidanan pa e sektor di restorantnan. E ahuste aki ta ku Restorantnan ku ta disponé di un terasa òf fasilidat pa sinta kome pafó, lo por kuminsá risibí kliente atrobe esaki lo ta posibel entre djaluna pa djasabra. Ta permití te ku un máksimo di 50 porshento di e kapasidat di e terasa.

Mester tin distansia di 2 meter entre e mesanan i un máksimo di 4 persona por okupá un mesa. E restorantnan por sirbi solamente klientenan ku ta sinta na mesa di e establesimentu. Músika den ‘backround’ ta posibel atrobe segun medidanan den areglo.

 Pa e restorantnan ku no ta disponé di un terasa of fasilidat pa sinta kome pafó, por sirbi klientenan solamente pa medio di entrega na kas (delivery) òf “curbside pick up”. Orario di servisio ta segun pèrmit ekonómiko te ku 8′ or di anochi. Riba djadumingu por ofresé solamente entrega na kas (delivery).  

  Tambe a hasi algun ahuste den e medidanan pa trùk di pan nan, esaki ta ku nan lo por ofresé servisio entre 4′ or di atardi pa 8′ or di anochi. Den kuadro di e medidanan di prevenshon kontra Covid-19, trùknan di pan por sirbi klientenan solamente pa medio di entrega na kas (delivery) of “curbside pick up”. Riba djadumingu por ofresé solamente entrega na kas (delivery).