WILLEMSTAD – Lo trata e proyekto di lei pa establesé reglanan pa loke ta trata modèlnan yamá ‘Modellenlandsverordening’ dia 9 di yüni próksimo. Manera Vigilante a publiká na febrüari último, despues di un reunion kòrtiku den Komishon Sentral den kua Parlamentarionan no a hasi niun pregunta tokante e proyekto, a disidí ku e proyekto di lei ta kla pa tratamentu durante un reunion públiko. Lo hasi pregunta durante e debate akí.

Riba proposishon di Presidente di Parlamento Charetti America-Francisca despues di e reunion den Komishon Sentral, a saka un informe blanku dje reunion. Entretantu el a konvoká e reunion pa 9’or di mainta, i a stipulá e tempu pa papia durante e debate públiko na 20 minüt den promé tanda i 10 minüt pa e segundo tanda.

Parlamento a risibí e proyekto di lei aña pasá. E lei di diseño ta referí na protekshon di e apariensia di un produkto. Asina gobièrnu ta splika den su Aklarashon tokante dje proyekto di lei. Den e ordenansa nashonal a opta pa usa e término ‘modèl’ pa referí na tantu e dibuhonan (e apariensia bidimensional di un produkto), komo e modèlnan (e diseño eksterno tridimensional di un opheto). Por ehèmpel e por ta un dibuho den forma di patronchi di papel ku ta ‘behang’ muraya kuné. No ta trata di e protekshon di e dibuho riba su mes, sino dje protekshon di e produkto ku ta atkerí un apariensia diferente ku e dibuho.

E derecho di diseño ku esun ku a pidi esaki ta haña, ta inkluí un rekurso legal ku por usa pa kombatí entre otro e falsifikashon òf pirateria durante un periodo determiná. “Nos pais tin protekshon di marka (merkbescherming) pa algun aña kaba pa medio di un ordenansa nashonal. Un régimen hurídiko spesífiko pa protekshon di diseño ta mes nesesario ku protekshon di marka. Esaki ta nesesario entre otro a base di e diferente desaroyonan den komèrsio tantu nashonal komo internashonal, kaminda e kompetensia ta kada bes mas grandi.”

Segun gobièrnu, e diseñadónan di modèlnan na Kòrsou mester tin e oportunidat di usa un derecho eksklusivo durante un sierto periodo, pa nan por probechá plenamente dje benefishinan di nan kreatividat. Sinembargo, no ta deseabel pa kompetensia liber pa tin e monopolionan akí i laga nan sigui eksistí indefinidamente. P’esei mes den e konsepto di lei a opta pa un protekshon durante 5 aña, ku kuater opshon di ekstenshon, pues un total di 25 aña.

Diseñadónan tin komo ophetivo usa e derecho eksklusivo atkerí ku e lei di diseño ta ofresé riba merkado, i saka probecho di su trabou kreativo. “Den e sentido ei durante e último añanan vários pais internashonal a buska kada bes di nobo pa traha ku otro i yega na un protekshon adekuá di propiedat intelektual, p’asina por promové komèrsio internashonal i ekonomia. E komunidat internashonal ta konsiderá ku e falta di un regulashon adekuá di e propiedat intelektual ta un opstákulo pa komèrsio internashonal. Den e konteksto ei ta referí na e Tratado ku ta establesé e Organisashon Mundial di Komèrsio, ku tin komo ophetivo eliminá e bareranan komersial akí i e otro bareranan komersial mas tantu posibel.”

Segun gobièrnu, un pais den desaroyo manera Kòrsou mester sigui e tendensia i ta kapas pa ofresé sufisiente protekshon di e derechonan di propiedat intelektual den su propio pais. Den e konteksto ei a entregá un petishon tambe pa rekonosementu di e Tratado ku ta establesé Organisashon Mundial di Komèrsio. E Tratado akí tin komo ophetivo stimulá komèrsio mundial. Parti di e tratado akí, ta e Tratado pa Protekshon di Derechonan di Propiedat Intelektual i e Lucha kontra Komèrsio di Merkansia Falsifiká, esta e Tratado TRIPS.

E ophetivo dje tratado TRIPS ta krea un nivel mínimo di protekshon riba e tereno di propiedat intelektual den e paisnan ku ta forma parti dje tratado ku ta establesé Organisashon Mundial di Komèrsio. Kòrsou mester establesé legislashon ehekutivo riba e tereno di propiedat intelektual. I asina Kòrsou lo kumpli ku e eksigensianan mínimo dje e nivel di protekshon establesé den e tratado akí. E proyekto di lei akí ta kumpli asina ku e implementashon di e eksigensianan dje tratado TRIPS pa loke ta trata lei di diseño.