Willemstad,– “Tur hende lo por tin un kuenta koriente, ta trahando riba e proseso di e lei, kaminda ta bai bira ku tur banko komersial tin ku habri un kuenta di banko pa tur siudadano”, asina Minister Kenneth Gijsbertha a duna di konosé.

E titular di finansa ta bisa ku e asuntu di ku no ta habri kuenta pa sierto hende lo pasa pa olvido i konsekuentemente riferonan tambe lo por haña nan kuenta. E ta bisa ku sigur mirando ku awendia tur hende ta swaip i no ta posibel pa swaip si bo no tin un kuenta, “pues si nos kier evitá ku hende tin sèn kèsh riba nan, tur hende lo mester tin un kuenta bankario”, na palabra minister di finansa señor Kenneth Gijsbertha.

Señor Gijsbertha ta splika ku esaki ta na benefisio di e banko tambe paso tur lokual bo hende i paga na premio, e diferensha ei ta solamente loke e rifero lo por depositá riba su kuenta. Lo bai tin un sistema di kontròl i transparente i pues bankonan por tin tur siguridat ku lo no por tin labamentu di plaka.

Señor Gijsbertha ta sigui bisa ku e outomatisashon aki riferonan por ta trankil i lo haña nan kuenta.

E ta bisa tambe ku Bankonan mes ta promoviendo pa bai mas tantu posibel ‘online’ i ademas tur siudadano tin derecho di tin un kuenta, pues pronto bankonan práktikamente lo ta obligá di habri un kenta di banko pa kliente, paso esaki ta un derecho di e siudadano.