Back to Top
Responsive image
E korant di pueblo

RIVM: Por detektá transmishon di Covid-19 den awa di riolering


August 3, 2021 • 2 minüt pa lesa

RIVM ta intensifiká investigashon pa detektá Covid-19 den awa di riolering

PUNDA- RIVM a anunsiá wikènt pasá ku nan lo intensifiká esfuerso pa lokalisá e vírus di Covid-19 den awa di riolering. Señal di infekshon ku coronavirus por keda detektá den shushi humano promé ku un persona desaroyá síntoma. Muestra frekuente di e sistema di riolering por yuda GGD na Hulanda lokalisá transmishon di e vírus.

Agensia di Salú Públiko a kuminsá tèst awa di riolering pa detektá e vírus di Covid-19 for di febrüari 2020. For di e momentu ei, investigashon a oumentá pa inkluí mas ku 300 planta ku ta trata awa di riolering. Pa komienso di otoño (herfst), RIVM ke kuminsá tuma muestra di e sistema di riolering 3 pa 4 bia pa siman kompará ku 1 pa 2 bia aktualmente. Segun investigadó di RIVM, Ana Maria de Roda Husman, mas regular e muestranan wòrdu tumá, mas lihé por veriguá si transmishon di e vírus a oumentá òf redusí.

Tin diferente método pa determiná transmishon di Covid-19 den un pais. E manera mas prinsipal i usual ta dor di midi kantidat di kasonan positivo i kantidat di persona hospitalisá ku Covid-19. Na momentu ku kasonan di persona hospitalisá baha debí ku mas persona ta bakuná i kapasidat di hasi tèst tambe desminuí, e método di tèst awa di riolering lo ta un tèst alternativo pa midi tranmishon di e vírus. Ademas, por detektá variantenan nobo for di muestranan di awa di riolering.

RIVM tin hopi eksperensia den detekshon di vírusnan for di awa di riolering i e plantanan di instalashon ku ta trata e awa di riolering. E método aki lo yuda Hulanda mantené kontrol riba posibel brotenan den futuro, De Roda Husman ta bisa. Tambe Hulanda a rekomendá Komishon Oropeo pa informá demas paisnan den lucha kontra Covid-19 pa hasi uso di e método di tèst aki.

Login