Mei 2022: For di Mei 2022, Kontrolaria General (ARC) a duna un presentashon den Komishon Sentral di Parlamento, tokante e rapòrt titulá ‘Financiële positie van de gesubsidieerde instellingen over de jaren 2016 tot en met 2020’

Punda—Gobièrnu di Kòrsou ta kedando sin konsiderá e alerta di Kontrolaria General pa kuminsá kontrolá organisashonnan ku ta risibi supsidio. Segun Kontrolaria General alrededor di 15 mion florin ta desperdisia anualmente sin ku e organisashonnan ta hasi algu ku nan supsidio of aló ménos ta responsabilisá esaki.

For di Mei 2022, Kontrolaria General (ARC) a duna un presentashon den Komishon Sentral di Parlamento, tokante e rapòrt titulá ‘Financiële positie van de gesubsidieerde instellingen over de jaren 2016 tot en met 2020’. Despues di e presentashon, miembronan di Parlamento a hasi vários pregunta na e delegashon di Kontrolaria General i tambe a ekspresá nan preokupashon pa e echonan konstatá den e rapòrt.

Manera Vigilante a yega di publiká na vários okashon, e rapòrt tokante e maneho di gobièrnu di duna supsidio ta basta negativo. E resultadonan dje investigashon ta indiká ku no tin un kuadro pa e maneho. Práktikamente gobièrnu ta saka plaka pa loko, miéntras gran parti dje plaka di supsidio ta bai na gastunan di personal dje instansianan supsidiá. E  servisio ku nan ta duna no ta garantisá. Segun Kontrolaria General, p’esei Parlamento mester hasi su trabou i kuminsá kontrolá e dunamentu di supsidio. E Parlamentarionan mester eksihí e kuentanan anual. Tin por lo menos 52 organisashon ku ta gastando en total kasi 15 mion florin anual di supsidio sin duna resultado.

For di e investigashon di Kontrolaria General pa sa posishon finansiero di instansianan ku a risibí supsidio strukturalmente durante 2016 te ku 2021, a resultá ku no ta tur e ministerionan di gobièrnu ta disponé di un plan di aserkamentu pa por atendé ku e problemanan finansiero señalá den rapòrt anterior di Kontrolaria General. A base di desishon di Konseho di Minister, e Ministerio di Finansa mester sigui paga e instansianan supsidio apesar ku nan no ta entregá e kuentanan anual denter di e plaso preskribí.

Pa kolmo ta saka plaka na supsidio siendo ku diferente ministerio no ta disponé di un kuadro di maneho pa por determiná kua servisionan ta bin na remarke pa risibí supsidio i na ki preis. E ministerionan no ta disponé di un plan di aserkamentu pa atendé ku e problemátika di e debenan haltu di e instansianan tampoko. “Apesar di e situashon finansiero débil di e instansianan i e echo ku e instansianan no ta entregá nan dokumentonan di responsabilisashon, òf no ta entregá esakinan na tempu, ta resultá ku gobièrnu ta laga Finansa paga e supsidio na e instansianan.”

Komo konsekuensia di esaki gobièrnu ta kore e rísiko di no por garantisá e (kalidat di e) servisio ku e instansiannan akí ta duna komunidat. E riesgo lo sigui subi miéntras ku gobièrnu no tuma e medidanan nesesario pa atendé ku e problemanan strukturalmente. Segun Kontrolaria General no ta parse ku tur ministerio ta trahando na un manera konkretamente bisto riba un trayekto di reforma pa atendé e problemanan ku e instansianan ta konfrontá. No tin akshon konkreto di parti dje ministerionan konserní pa obligá e instansianan pa responsabilisá na tempu, ni pa atendé ku e debenan di impuesto i gastunan sosial.

P’esei Kontrolaria General ta rekomendá Parlamento den e rapòrt, pa kontrolá e efektividat di e supsidionan otorgá. Parlamento mester mustra Konseho di Minister tambe ku nan no por permití ku e instansianan ta violá lei i desviá dje término preskribí pa entregá nan kuentanan anual pa responsabilisá e supsidio risibí. Kontrolaria General ta rekomendá ademas pa Parlamento mustra e Minister di Finansa ku su ministerio no por (laga) paga supsidio na e instansianan, si nan no ta kumpli ku e obligashon pa responsabilisá manera preskribí den e ordenansa di supsidio.