Maharo Isenia, Hefe Komunikashon pa Gobièrnu di Kòrsou.

Fòrti Amsterdam—Bou di maneho di Hefe di Komunikashon pa Gobièrnu di Kòrsou, , Maharo Isenia, rueda di prensa semanal ku miembronan den Hunta di Minister, a disparsé. Aló ménos, tin algun aña kaba ku e ruedanan di prensa den pasado entre Prensa lokal i Hunta di Minister no tei mas.

Pa motibunan deskonosí, e posibilidat pa periodistanan lokal por kuestioná desishon di Hunta di Minister, a simplemente disparsé. Pero, algun aña pasá, a laga konstruí den Fòrti di Amsterdam un sala pa enkuentro ku prensa ku práktikamente no ta utilisá mas, sigur no pa prensa lokal por kuestioná gobièrnu di Kòrsou.  No ta konosí dikon esaki a disparsé, pero ta un hecho ku e aktual maneho di Isenia no ta dirigí riba esaki, lokual por yega na liña di limitashon akseso di pueblo na e posibilidat di keda informá riba maneho nashonal. Na e momentonan aki, Kòrsou no tin èrmènt disponibel pa yega na akseso públiko riba desishonnan den Hunta di Minister semanal. Esaki ta kumbiní na promé lugá e unidat di komunikashon na Fòrti Amsterdam debí na ménos trabou, pero tambe Hunta di Minister riba su mes, kual ta uzando akseso liber via di ret sosial.

Aparte di e desaroyo menshoná, periodistanan “top” di Kòrsou a evitá na presentá den sala di komunikashon tambe, debí na e maneho di Isenia pa limitá kantidat di pregunta i interogatorio liber. Na tur rueda di prensa organisá den e sala di konferensha nobo na Fòrti, periodistanan ta keda limitá na dos pregunta i kisas tres i no tin e derechi mas di “ kuestioná” sino di “puntra”.

Den pasado, eks hefenan di komunikashon na Kòrsou, tabata organisá “rueda di prensa” i no enkuentro ku prensa. Tabatin oportunidat di puntra i alabes kuestioná, maneho di e ministernan fuertemente unda tantu e kalidat di prensa lokal ta desaroyá, pero tambe e minister por interkambio i hasta “diskutí” ku e periodistanan.

Pero, for di dia ku Maharo Isenia ta manehando e servisio di komunikashon, periodistanan a distansha nan mes for di Fòrti, den lokual a benefisiá Gobièrnu di Kòrsou. Un maneho kuestioná ku a okashoná un limitashon serio di akseso liber na Kòrsou riba desishonnan ministerial. Na St Maarten i na Aruba, ainda prensa tin e posibilidat di asistí na ruedanan di prensa despues di un reunion semanal den Hunta di Minister.

 Vigilante lo sigui amplia riba e problemátika.