Na momento ku Cijntje a bai pa huramentá serka Gobernador.

Willemstad,– Ayera na un fòrti basta drùk kaminda a tuma lugá dos diferente manifestashon di dos organisashon, e Minister di Ekonomia, Ruisando Cijntje a logra huramentá.

Minister di Ekonomia, Ruisandro Cijntje a duna di konosé ku aworakí tin 3 punto ku lo bai bira prioridat ku e lo hinka basta energia aden. Esaki ta trabounan relatá na turismo, ya komo ku a mira ku esaki a kuminsá krese bèk.

Di dos punto lo bai bira desaroyo interno di e pais. Akinan a énfasis lo bin riba prosesá pèrmitnan ku ta wanta ketubai den diferente departamentu di gobièrnu. Tambe lo bai buska invershonista nan internashonal. Lo buska e sèn ku mester bin di afó pa asina e eskala por bira mas grandi pa asina hinka un energia nobo den e ekonomia.

Minister di Ekonomia, Ruisandro Cijntje ta sigui splika ku e tin pensá na bin ku un plan nobo pa invershonista internashonal pa asina ora ta bai ofresé nan e chèns, lo bai tin un portafolio kompletu kaminda lo bai splika kiko tur bo ta bai haña na momentu ku bo invertí.

Ruisandro Cijntje ta finalisá bisando ku e reto ta grandi i ku e tin gobièrnu i parlamento pará su tras. Lo e bai sinta ku ministerio pa wak kon tur kos ta kanando pa asina por sa di tur loke nos ta aden.