Si no aktua rápido e deterioro físiko i ‘braindrain’ di refineria lo hasi re-apertura di refineria imposibel.

WILLEMSTAD – Rutsel Martha di Lindeborg Counsellors at Law den un karta na Konseho di Ministernan i miembronan di frakshon di MFK i PNP den Parlamento tokante apertura dje kompleho di refineria, a rekordá ku GIK Refineria BV tin e mihó oferta segun Refineria di Kòrsou (RdK). E ta preokupá ku si no aktua rápido, e deterioro físiko i ‘braindrain’ di refineria lo hasi re-apertura di refineria imposibel.

“Mirando ku ya a pasa mas di mei aña i ainda no tin un konklushon positivo pa loke ta trata e problemanan serio i kada bes mas grandi ku ta rondoná e kandidato kontroversial pa habri e refineria bèk i operá e kompleho di refineria di Kòrsou, mi ta referí un biaha mas na e oferta vinkulante di 28 di mart 2022 di GIK Refineria BV (GIK), ku originalmente ta kompletamente kalifiká pa RdK, i klasifiká komo e mihó oferta pa e Hunta di Komisarionan di RdK.”

Martha a rekordá gobièrnu i e partidonan di koalishon den Parlamentu tambe dje segundo mihó oferta di e Steering Committee di RdK. “Den e konteksto ei, mi ta reiterá formalmente ku GIK ainda ta komprometé i dispuesto pa aseptá e responsabilidat di habri refineria bèk i operá esaki na un manera ambiental rashonal i sostenibel, a base dje proposishon di GIK. Ta nesesario rekordá boso ku den e karta di 1 di sèptèmber 2022 mi a ekspresá eksplísitamente e preokupashon di GIK pa e deterioro físiko kontinuo i inmimente dje refineria.”

Entretantu ya a pasa mas ku 4 luna sin ku a inisiá e reparashonnan mas urgente i nesesario pa habri e refineria bèk di forma responsabel i sigur. Tambe Martha a pidi Konseho di Ministernan i miembronan di frakshon di MFK i PNP, pa tene kuenta ku e pèrdida di persona tékniko importante i esensial, ku lo tin konsekuensianan grandi pa e re-apertura real dje refineria. Martha: “E retrasonan irashonal adishonal den e firmamentu di e akuerdo ku e operadó kompetente, lo duna komo resultado un aselerashon mas grandi dje deterioro físiko i e ‘braindrain’ dje refineria. Esaki lo hasi e re-apertura previsto dje kompleho di e refineria di Kòrsou mas difisil i posiblemente imposibel.”