Willemstad—–Temporada di orkan ta aserkando i ta importante pa bo ta bon prepará. Ta p’esei Fundashon pa konsumidó ta kompartí algun tep balioso pa bo tene kuenta kuné pa asina bo ta bon prepará na momentu ku un kalamidat presentá. Nos ta rekomendá pa traha un plan di emergensia pa asina evitá ku mester hasi tur kos na último momentu i gasta mas sèn ku ta nesesario.Den e plan aki ta palabrá huntu den famia kada stap ku kada persona mester tuma si algu pasa. Den e plan di emergensia aki tambe por indiká unda ta warda tur dokumento importante i e kaha di emergensia.
Prepará un kaha di emergensia
Den e kaha aki bo ta sòru pa warda tur loke mester den momentu di emergensia. Pone solamente loke ta realmente nesesario den e kaha aki. Den e kaso aki por pensa riba por ehèmpel alimentonan seku òf di bleki, sufisiente awa, remedi, flashlight , radio di bateria, produktonan higiéniko etc.
Kontrolá si bo seguro di kas ta adekuá
Un seguro kontra daño na bo kas ta sumamente importante. Mester sòru di check ku e kompania di seguro si bo tin e seguro adekuá pa bo kas. Pues ku e seguro aki ta kubri daño hasí na bo kas pa motibu di kalamidat. Ta importante pa wak si bo seguro lo kubri tur daño na bo kas na momentu ku algu pasa.
Hasi bo kas sigur i keda alerta
No warda te na último momentu. Hasi trabou di reparashon, klaba tur loke ku ta lòs i tapa tur buraku na kurpa di e kas. Sigurá bentana i dak. Limpia kurá pa evitá ku tin ophetonan ku por bula i kousa mas peliger. Den e temporada aki tambe ta sumamente importante pa bo keda pendiente, kuida bo mes i otro nan. Mantené bo mes bon informá pa asina bo sa kon ta e mihó manera pa bo prepará. Riba nos wèpsait www.fundashonpakonsumido.org tin informashon dirigí riba e preparashon pa kalamidat pa asina abo por prepará di forma konsiente. Keda pendiente pa nos anotashon di preis di material pa konstrukshon na komienso di yüni ku tambe por yuda bo pa por hasi e mihó eskoho pa kaba di drecha bo kas i ta bon prepará pa e temporada aki.
Pa kualkier informashon òf remarke por semper tuma kontakto ku Fundashon pa Konsumidó na 462- 6666 òf manda nos un e-mail na [email protected] .