Dorothy Janga ayera a tuma despedida.

PUNDA—Eks minister di Salubridat Públiko, Dorothy Janga den su karta di retiro entrega na Gobernadó Lucille George Wout, a enfatisá riba e peliger di kostonan haltu den kuido médiko.

Aparte di e kostonan haltu, e kontribushon di SVB tampoko no ta sufisiente pa yuda prinsipalmente CMC. Durante Parlamento,  Dorothy Janga  a duna di konosé ku pa 2023, 184 mion ta destiná for di presupuesto di kuido pa CMC. Ta trata di mesun suma pa 2022, kual no a resultá di tabata sufisiente. Ku e desishon di Janga pa mantené e suma na 184, e problema di CMC ta bira mas grandi. Segun Minister di Finansas Públiko, Javier Silvania, pa 2023 CMC por kuminsá paga su debenan. Na 2022, CMC a risibi 184 mion for di presupuesto di kuido i adishonal 16 mion florin. E 16 mion florin tabata pa paga 85% di salario pa spesialista. E suma total presupuesto pa CMC na 2022 tabata en total 200 mion florin.

Pero e 200 mion no tabata sufisiente. CMC a gasta na kuido di pashèntnan di SVB durante 2022 te ku novèmber 248 mion florin. Te ainda ta trata di un défisit di por lo ménos 48 mion florin. Na 2021 CMC a gasta 254 mion pa kuido di pashèntnan di SVB i na 2020 222 mion. E suma menshoná pa minister Dorothy Janga den e reunion di parlamento, lo no ta sufisiente tampoko na 2023, prinsipalmente si konsiderá oumento di inflashon den kostonan médiko.

E ponensha aki e la bolbe enfatisá ayera den su karta di retiro. Te ainda por konkluí tambe pa motibu di Presupuesto di Kuido defisiente, no por kubri tur gastu di BVZ pashèntnan ta okashonando e.o. pèrdida grandi na CMC di alrededor di 124 mion florin. Aparte di e insufisiente fondo den presupuesto di kuido, CMC ta sigui karga kostonan èkstra di indokumentadonan sin seguro i 16 mion florin di Covid.