Back to Top
Vigilante banner image

Segun Mike Eman: Medidanan di gobièrnu lo hasi pais Aruba hopi mas karu


December 17, 2022 • 2 minüt pa lesa

Frakshon di AVP pa medio di Mike Eman a atvertí gobièrnu i e partidonan MEP i RAIZ, ku e medidanan aki ta bai kousa mas pobresa na Aruba.

Oranjestad,– “Ku un lei ku a wòrdu aprobá djarason anochi dor di e frakshon nan di MEP i RAIZ den Parlamento di Aruba, tur hende na Aruba, tur negoshi na Aruba ta bai wòrdu afektá severamente. E lei aki di Gabinete Wever Croes yama “Plan di belasting 2023”, pero en realidat e ta un PAKETE DI MEDIDA”, asina Mike Eman lider di frakshon i lider polítiko di partido AVP a duna di konosé ayera den medionan di komunikashon na Aruba.

E ta splika ku frakshon nan MEP/RAIZ a ninga di invitá e sindikato i e organisashonnan komersial pa skucha nan opinion tokante e lei aki i su konsekuensianan. Eman ta bisa ku asina mes diferente organisashon a analisá e pakete di medidanan den e lei aki i a duna nan konsehonan. Tur konseho i atvertensia na Gabinete Wever-Croes tabata serio, ku desaprobashon fuerte pa e medidanan den e lei i ku un apelashon urgente na gobièrnu pa no trata e lei aki. 

Frakshon di AVP a insistí pa skucha e gremionan, pero sin ningun forma di diálogo, MEP i RAIZ a aprobá pa di sinku aña konsekutivo un pakete di medida pisá. Loke ta hasi e pakete aki diferente ku tur e otro añanan, ta e kantidat di medida pa tur hende i tur sektor di ekonomia na Aruba. Tambe e konsekuensianan di e medidanan aki lo ta mas severo pa henter pueblo di Aruba. Eman ta splika ku tur hende ta bai atras, e negoshinan chikitu lo tin mas problema pa keda habri, Aruba ta bai bira hopi mas karu pa e turistanan, miéntras ku ta kita di e plaka ku tin disponibel pa hasi merkadeo pa Aruba den eksterior. 

Frakshon di AVP pa medio di Mike Eman a atvertí gobièrnu i e partidonan MEP i RAIZ, ku e medidanan aki ta bai kousa mas pobresa; ku nan lo pone spesialmente e kompanianan mediano i chikí bou hopi preshon finansiero i ku peliger pa sera nan negoshi,  i ora negoshinan sera hopi hende lo pèrdè trabou i ku e medidanan nobo aki di MEP i RAIZ lo hasi Aruba ménos atraktivo pa e turistanan i e invershonistanan. Pero mas ku tur kos, frakshoná di AVP a mustra ku e sifranan ofisial di departamentonan di gobièrnu mes, ku spesialmente e mas ku 50 mil hende ku ta gana un salario ménos di 3000 florin pa luna, e pensionadonan ku un penshun di gobièrnu/SVb, e trahadónan ku ta traha riba nan mes i e siudadanonan ku ta haña un ònderstant, tur lo bai ainda mas atras den nan forsa di kompra. Partido AVP a kalkulá ku ta mas ku 50.000 hende lo ta seriamente afektá dor di e medidanan aki di MEP i RAIZ ku e peliger grandi ku mas hende lo kai den pobresa.

Pa prevení esaki frakshon di AVP a presentá un amienda durante di e reunion públiko ku a enserá un kantidat di proposishon pa evitá e medidanan di Gabinete Wever-Croes i pa duna un alivio na pueblo, entre nan proposishonnan pa oumentá “reparatietoeslag” pa e empleadonan na 300 florin pa luna i tambe pa pensionado, “weduwen en wezen en bijstandtrekkers”. Pero Frakshon di MEP i RAIZ a vota kontra di e amienda di frakshon di AVP.

Login