Mocky Job komersiante di mas ku 52 aña den Punda.

Punda- Sentro di Siudat Punda birando dia pa dia mas bashí. A hiba un kombersashon ku un komersiante ku tin mas ku 50 aña den Punda.

Vigilante a kombersá ku Sr. Mocky Job kende a duna su punto di bista pa ku e situashon di nos Sentro di Siudat ku ta birando dia pa dia mas tristu. Mocky a splika ku e tin 52 aña komo komersiante den Punda i ku e tin su mes edifisio. Hopi lugá ta sera pa e motibu ku nan no por paga hür, yunan di Kòrsou no tin sèn ku nan ta tin ántes. Hopi hende ta sin trabou, anto esnan ku ta haña mas turista ta esnan ku ta wanta mas mihó òf tin ménos gastu di hür. Tambe esnan ku ménos empleado ta logra di skapa e situashon, manera e la splika ku e mes ta un empleado e tin i e mes ta funshoná komo trahadó i anochi e ta hasi su atministrashon. Bo gastunan mester ta abou pa bo por sobrebibí e kos aki. Situashon di Kòrsou a dal sentro komersial di Punda hopi duru. Tin algun turista ku ta kumpra manera, hulandesnan, turistanan di barku pero ora ku fakansi pasa e ta bolbe bai kai atrobe. Hopi lugá a sera.  Pa e yu di Kòrsou nan tin hopi di nan ku no tin trabou, nan no por kumpra. E pakusnan no por drai riba nan so i nan tin ku drai riba mas turista.

Turistanan ku ta gasta i no esnan ku ta kana wak so, manera bo ta haña esnan di barku. Situashon di Kòrsou no ta Punda so, pero tur kaminda. Corona a bin koroná e kos, promé ku Corona kaba bo tabata mira e situashon tabata bayendo atras. Ya esaki tabata malu, basta aña kaba ku e situashon a bai atras. Manera Venezuela a bira malu nos a bai atras e la sigui bisa. E tempunan ei Venesolanonan tabata kumpra hopi, pero lubidá e kos ei paso por lo pronto bo no ta bai hañ’é.  Pues negoshinan pa bende merkansia no ta sobrebibí. Hopi di nan ta bende meskos,  tur benta a baha. Pa loke ta trata e edifisionan tambe ta kayendo, hopi no ta wòrdu mantené. E la splika tambe e mes komo komersiante awor aki mester hasi un mantenshon pa ku su edifisio i ta bezig ta wak e tempu pa hasi esaki. Esun di dje no ta  bai tuma masha tempu, paso parti paden ta hopi bon, pero si mester hasi e mantenshon.  Pero tur esakinan ta dependé di e benta ku bo ta haña i  e no ta manera ántes, paso awoki bo no ta haña hopi benta, esaki sigur bo no ta haña niun kaminda.

Tin asta sentro komersial nan manera na Winston Churchillweg unda tin yen lugá bashí, paso no tin salida pa  e merkansianan. E la splika ku e ta kere ku  na Kòrsou tin muchu negoshi meskos riba un isla chikí asin’aki. Hopi lugá ta bende paña i hopi ta meskos, pero ya porta un mas mihó ku otro. Restorant tambe tin hopi. Yunan di Kòrsou mester di mas entrada,  i esei ta pone ku nan por gasta un poko mas. Hopi lugá ta serando paso no tin trabou i naturalmente bo forsa kompra tambe ta baha . Enbes di kumpra dos di un kos nan ta kumpra unu. E úniko kos ku ta bai bon na Kòrsou ta kuminda esta bo ta papia di supermerkado. Lugánan ku ta bende paña, sapatu i e kosnan ei enbes di kumpra dos karson bo ta kumpra unu i uz’é pa 6 luna largu. Frankamente bisa e úniko sèn ku ta drai bon ta supermerkado i minimarketnan nan si ta bende.

Bo mester di kuminda. E la splika ku serka dje su preisnan ta asina abou ku e ta haña e hende ta kumpra dos i e por mantené su preis abou asina. Su gastunan ta mas  abou i esei ta pone ku e ta na bida ketu bai. Loke ku Kòrsou mester haña manera CTB a bisa ta ku nan mester kuminsá drecha e edifisionan pa nan ta den bon kondishon. Esei ta pone ku nan ta kai bou di monumentonan i ta duna e turista mas gana di wak nan. Si nan keda manera nan ta na e momentunan aki nan ta pèrdè di ta den e “World Heritage”. Den e kaso ei mester di un par di mionario òf hopi lugá ta keda drecha pa monumentenzorg i esei si ta yuda. Kasualmente monumentenzorg ta drechando snoa na e momentunan aki, pero si e persona bai hasi esaki riba su mes e no lo bai logra. E la terminá bisando ku e no sa kiko ta e solushon pa mehorá e situashon.