Nieuwe Haven— Korte penal a trata kaso kontra di e hòmber L.J.N unda ku ta akus’é di lo tabata ‘stalk’ un dama unda ku e tabata yama e dama riba Whatsapp riba diferente number di telefòn. Segun deklarashon nan i screenshot di Whatsapp esaki a dura kasi 3 aña largu. E dama mester a hasi dos denunsia pa e hòmber stòp di tuma kontakto.

Tabata den e periodo di 1 di Desèmber 2016 te ku 22 di Ougùstùs 2019 ku e akusado tabata ‘stalk’ e dama aki. E dama kual ta e víktima di e stalking a deklará ku e hòmber tabata bèl e masha hopi mes. Ta asina ku e dama a deklará ku e tabata asta risibí yamada den oranan di mardugá te mainta trempan. Aparte di esaki e dama a bin haña problema ku su pareha, paso e pareha a kuminda duda den dje i bis’é ku e tin un otro hòmber. Debí ku e dama no konosé e hòmber, esaki tabata kousa basta strès pa e dama i su famia.

E screenshotnan di Whatsapp ta demonstrá riba diferente okashon ku e hòmber tabata bisa ku e stima e dama i ku e ke tene un relashon seksual kuné. I ta asina ku e dama a yega di risibí potrètnan seksual di e hòmber. Den un deklarashon di e hòmber, el a bisa ku e konosé e dama via televishon i ta riba televishon el a wak e dama su number di telefòn.

E famia di e hòmber no tabata sa ku e hòmber tabata stalk e dama. Na momentu ku e mayor di e hòmber a sa di esaki nan a rabia basta i segun  miembro di e famia for di chikitu e hòmber tin problema mental i asina e no ta funshoná manera un persona normal. Ayera durante tratamentu di e kaso e hòmber a indiká ku ya e no ta tuma kontakto mas ku e dama paso e la haña un frei nobo.

Fiskal mr. Niks a indiká ku na su opinion e akusado mester risibí yudansa di un sikólogo pa asina nan lo por yud’é. Segun reclassering na nan opinion ta bon pa por sigui e rapòrt ku sikiater a duna di e akusado. Sikiater a indiká ku mester bin un guia di un sikólogo, tambe ku no ta normal ku ta uza rapòrt nan bieu pero den e kaso aki no ta mira un pakiko duda den e rapòrt di 2019 ku a keda hasi.

Segun Fiskal ta tene kuenta ku echo por wòrdu proba i e akto ku e akusado a kometé ta kastigabel apesar ku nan ta bisa ku e ta ménos responsabel pa su akto nan. P’esei fiskal a hasi un demanda di 1 luna di prizòn kondishonal, 2 aña di prueba , e akusado mester bai bou di guia di sikólogo i reclassering.

Tambe fiskal a indiká ku e lo mester haña guia na SGR i aparte di esaki nan fiskal ta haña ku e mester risibí algu pa e bira konsiente ku lokual ku e la hasi no ta bon p’esei e ta pidi 40 ora di trabou inkondishonal. Abogado mr. Eisden tabata di akuerdo ku e demanda di fiskal, segun e abogado na su opinion e kliente mester di yudansa enbèrdat.

Wes mr. Edelenbos a bisa e akusado ku e ta mira ku awor aki tin un adelanto pero e no usa ku den futuro e lo bai hasi meskos atrobe. Wes a bai di akuerdo ku e demanda di fiskal i a indiká na e akusado ku si e no kumpli ku e 40 ora di trabou e mester bai enkarselá pa 20 dia.